रुपन्देही । नेफ्स्कून फिल्ड कार्यालय रुपन्देहीको आयोजनामा संघमा आबद्ध बचत तथा ऋण सहकारी संस्थाहरुका लागि ऋण जोखिम व्यवस्थापन तालिम आजबाट बुटवलमा शुरु भएको छ । फागुन १८ र १९ गते सञ्चालन हुने दुई दिवसीय उक्त तालिमको उद्घाटन नेफ्स्कूनकी सञ्चालक एवं रुपन्देही सदस्य सेवा कार्यालय व्यवस्थापन उपसमिति संयोजक ज्ञानु पौड्यालले गर्नुभएको छ । 

तालिम उद्घाटनका क्रममा सञ्चालक पौड्यालले सदस्यहरुका लागि प्रवाह गरिने बचत र ऋणको सेवालाई प्रभावकारी र सुरक्षित बनाउनुपर्ने बताउनुभएको छ । ऋण सहकारी संस्थाको अपरिहार्य प्रक्रिया हो, “सदस्यको जीवनस्तर उकास्न, रोजगारी सृजना गर्न र उत्पादनमा जोडिन सक्ने आधार ऋणले दिन्छ, ऋणको प्रक्रियालाई प्रभावकारी र सुरक्षित बनाउन सक्नुपर्छ, उहाँले भन्नुभयो ।” सदस्यहरुलाई लगानी गरिएको ऋणमा जोखिम बढ्दा समग्र सहकारी संस्था र अभियान समस्यामा परेको र सहकारीमाथि गम्भिर प्रश्न खडा भएको उहाँले उल्लेख गर्नुभयो । नेफ्स्कूनले सदस्य संघ संस्थाहरुको मागलाई सम्बोधन हुने गरि निरन्तर तालिम शिक्षाका कार्यक्रमहरु आयोजना गर्दै आइरहेको र तालिमबाट सिकेको विषयहरुलाई संस्थागत प्रयोगमा ल्याई धेरै हदसम्म जोखिम न्यूनिकरणमा सहयोग पुग्ने विश्वास पौड्यालले व्यक्त गर्नुभयो । 

तालिममा अर्घाखाँची, पाल्पा, रुपन्देही, कपिलवस्तु र नवलपरासी गरि ५ जिल्लाका विभिन्न बचत तथा ऋण सहकारी संस्थाहरुबाट ३७ जनाको सहभागिता रहेको छ ।

तालिम सहजीकरण संघका बरिष्ठ तालिम अधिकृत कोमलराज अधिकारीले गर्नुभएको छ भने तालिम कार्यक्रम सञ्चालन व्यवसाय अधिकृत पवलजंग मल्लले र व्यवस्थापन बरिष्ठ सहायक नेत्रप्रसाद सापकोटाले गर्नुभएको छ ।