काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) झापा सदस्य सेवा कार्यालयको आयोजनामा मंसिर २७ गते व्यवस्थापन उपसमितिको बैठक बस्नुका साथै उद्यमशीलता विकास सेवा कार्यक्रम समेत सम्पन्न भएको छ ।

नेफ्स्कून झापा सदस्य सेवा कार्यालय व्यवस्थापन उपसमिति संयोजक नेफ्स्कून महासचिव घनश्याम अधिकारीको अध्यक्षतामा बसेको बैठकले संघको आसन्न ३३औं वार्षिक साधारण सभालाई व्यापक सहभागितासहित उत्साहपूर्वक सम्पन्न गर्न स्थानीय साकोसहरुको उल्लेख्य सहभागिता सुनिश्चित गर्ने निर्णय गरेको छ । त्यसका लागि उपसमितिका सदस्यहरु, जिल्ला र प्रदेश संघ, स्थानीय अगुवा सहकारीकर्मीहरु तथा व्यवस्थापनको सहयोग र प्रयासलाई थप ‘पुष’ गर्ने निर्णय गरेको छ । उपसमितिले अन्य समसामयिक विषयहरुमा पनि छलफलसहित राय, सल्लाह र सुझावहरु संकलन गरेको छ ।

यस्तै, संघको स्थानीय व्यवस्थापनलाई पनि केही मार्गनिर्देशनहरु प्रदान गरेको छ । बैठकमा आमन्त्रित अतिथिका रुपमा झापा बचत संघका अध्यक्ष तुलाराम न्यौपाने सहभागी हुनुभएको थियो भने संघको झापा सदस्य सेवा कार्यालय व्यवस्थापन उपसमिति सदस्यहरु बुद्धिसागर बराल र पवित्रा सुब्बा (महिला उपाध्यक्ष, सहारा साकोस) को उपस्थिति रहेको नेफ्स्कून सदस्य सेवा कार्यालय प्रमुख रेग्मीले जानकारी गराउनुभयो ।

यसैगरी, उद्यमशीलता विकास सेवा सम्बन्धी कार्यक्रम अन्तर्गत नेफ्स्कूनको कुनै न कुनै गुणस्तर सुनिश्चितता कार्यक्रममा आवद्ध ९ स्थानीय साकोसका व्यवस्थापन प्रमुखहरुको सहभागिता थियो । नेफ्स्कून झापा सदस्य सेवा कार्यालय व्यवस्थापन उपसमिति सदस्य बुद्धिसागर बराल समेत सहभागी कार्यक्रममा विषवस्तुबारे सहजीकरण सदस्य सेवा कार्यालय प्रमुख रिसभराज रेग्मीले गर्नुभएको थियो ।