काठमाडौं । नेफ्स्कून तथा जर्मनीको सेभिङज् बैंक अन्तर्गतको विकास नीति हेर्ने अंग (डीएसआईके) को आयोजनामा ३ दिवसीय कृषकहरुका लागि व्यवसाय खेल तालिम ज मंसिर १८ गते काठमाडौंमा सुरु भएको छ । तालिममा साकोस तथा संघहरुबाट गरी २५ जनाको सहभागिता छ । 

नेफ्स्कून र जर्मनीको स्पार्कासन्स फाइनान्स ग्रुप अन्तर्गतको डिएसआईके (जर्मन स्पार्कासन्स स्टिफटुङ फर इन्टरनेशनल कोअपरेसन) बीचको रणनीतिक साझेदारी अन्तर्गत यो तालिम आयोजना गरिएको हो ।

स्पार्कासन्स फाइनान्स ग्रुपले डिएसआईके मार्फत वित्तीय पहुँच अभिवृद्धि गरी गरिबी निवारणमा भूमिका निर्वाह गर्ने विषयमा सफल साबित आफ्नो मोडललाई मुलुकको सीमा र त्यो भन्दा पर विकासोन्मुख तथा उदीयमान अर्थतन्त्रहरुमा लागू गर्दै आएको छ ।

सोही सन्दर्भमा नेपालमा पनि सहकारीका सदस्यहरुमार्फत कृषि क्षेत्रमा संलग्न सदस्यहरुलाई आफ्नो व्यवसायको स्थापनादेखि बजारीकरणसम्म सहयोग पुग्ने हेतुले नेफ्स्कूनसँगको साझेदारीमार्फत आज यो तालिम सञ्चालन गरिएको हो । 

यसैबीच, तालिम उद्घाटन कार्यक्रममा नेफ्स्कूनका अध्यक्ष चन्द्र प्रसाद ढकालले डिएसआईकेसँगको रणनीतिक सहकार्यमार्फत नेपालको साकोस अभियान र अभियनामा आवद्ध सदस्यहरु लाभान्वित हुन सक्ने भन्दै तालिममार्फत व्यक्तिगत र संस्थागत सक्षमता विकास गर्न सहभागीहरुलाई आग्रह गर्नुभयो । साथै उहाँले, तालिम आयोजनामा प्राविधिक सहजीकरणका लागि डिएसआईकेका विभिन्न मुलुकस्थित लङ टर्म एक्सपर्टहरुलाई हार्दिक धन्यवाद व्यक्त गर्नुभयो । यस्ता, अन्तर्राष्ट्रिय सहकार्यमार्फत नेपालको साकोस अभियानलाई उत्पादनशील क्षेत्रमा ध्यान केन्द्रित गरी सदस्यहरुको जीवनस्तरमा तात्विक सुधार गर्न पुग्ने विश्वास अध्यक्ष ढकालले व्यक्त गर्नुभयो ।

तालिमको सुरुवातमा उत्प्रेरणा सार्थ उद्देश्यमाथि डिएसआईकेका क्रिश्चियन ग्राजेकले प्रकाश पार्नुभएको थियो भने कार्यक्रममा लौरा स्कियालो, प्रशिक्षक एड्विन् क्याडापाट, प्रशिक्षण सहयोगी थान टुङ फान, अनुवादक झमक नारायण श्रेष्ठ रहनुभएको छ । नेफ्स्कूनका बरिष्ठ अधिकृत नविनराज दाहालले तालिमको संयोजन गर्नुभएको छ भने व्यवस्थापन सहयोग अधिकृतद्वय रिता सुवेदी तथा पवन घिमिरेको रहेको छ ।

सहभागीहरुले तालिमामार्फत आफ्नो संस्थामा आवद्ध कृषक सदस्य तथा कृषि कर्ममा लाग्न चाहने सदस्यहरुलाई व्यवासको सुरुवाती चरणदेखि बजारीकरण तथा ब्राण्डिङसम्मका विषयमा प्राविधिक सहजीकरण गर्न सहज हुने अपेक्षा र विश्वास लिनुभएको छ ।

डिएसआईकेसँगको समन्वयमा नेफ्स्कूनले यसघि बिजनेश गेम सिमुलेशन, बचत खेल र लघु उद्यम खेल प्रशिक्षक प्रशिक्षण आदि तालिमहरु सञ्चालन गरिसकेको छ ।