काठमाडौं । पत्रकार माधव खड्का दुई सहकारी संघबाट पुरस्कृत हुनुभएको छ । खड्कालाई बागमती प्रदेश बचत तथा ऋण सहकारी संघ (बागमती प्रोस्कून) र ललितपुर जिल्ला बचत तथा ऋण सहकारी संघले पत्रकारिता पुरस्कार प्रदान गरेका हुन् ।बागमती प्रोस्कूनको चौंथो साधारण सभा र ललिपुर जिल्ला बचत संघको ३० औं साधारण सभाको अवसरमा खड्का पुरस्कृत हुनुभएको हो । नेपालपत्र न्युज डटकमका सम्पादक खड्का नेपाल सहकारी पत्रकार समाज (सीजेएन) का कोषाध्यक्ष समेत हुनुहुन्छ । 

दुबै कार्यक्रमका प्रमुख अथिति भूमि व्यवस्था, सहकारी तथा गरिबी निवारण मन्त्री बलराम अधिकारीले नगद र सम्मान पत्रले खड्कालाई सम्मान गर्नुभएको थियो । खड्काले पुरस्कारबापत बागमती प्रोस्कूनबाट नगद ८ हजार ५ सय सहित सम्मान पत्र तथा ललितपुर बचत संघबाट नगद ५ हजार ५५५ रुपैँया  र सम्मान पत्र प्राप्त गर्नुभएको छ । सम्पादक खड्का विगत एक दशकदेखि सहकारी पत्रकारिता क्षेत्रमा क्रियाशील हुनुहुन्छ ।