काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) की सञ्चालक सदस्य ज्ञानु पौड्यालले भर्खरै सम्पन्न  ताईवानी क्रेडिट युनियन अभियानबारे आफ्नो स्थलगत अध्ययन अवलोकन कार्यक्रमसम्बन्धी सिकाइ र उपलब्धिबारे संघको सञ्चालक समितिलाई जानकारी गराउनुभएको छ ।

नेफ्स्कून केन्द्रीय कार्यालयमा आज जारी संघ सञ्चालक समितिको ३ सय ३४ औं बैठकमा उहाँले आफ्नो भ्रमण कार्यक्रमको अनुभव र सिकाइ जानकारी गराउनुभएको हो ।

त्यसअघि, उहाँले ताइवानी केन्द्रीय बचत संघ-'कुलरक' को स्थलगत अध्ययन अवलोकन भ्रमण कार्यक्रमबाट नेफ्स्कूनलाई प्राप्त वार्षिक प्रतिवेदन, अध्ययन सामाग्री आदि संघका अध्यक्ष चन्द्रप्रसाद ढकाललाई उपलब्ध गराउनुभएको थियो ।

नेफ्स्कून सञ्चालक पौड्याल एशियाली ऋण महासंघ (अकू) को आयोजनामा नोभेम्बर ४ देखि ८ सम्म सञ्चालित '२०२४ कुलरक एक्स्पोजर प्रोग्राम' मा नेपाली साकोस अभियानको प्रतिनिधित्व गर्दै सहभागी हुनुभएको थियो । ताइवानी केन्द्रीय बचत संघ-'कुलरक' र नेफ्स्कूनबीच हार्दिक सम्बन्ध रहँदै आएको छ । उक्त भ्रमणका सिकाइहरु नेपालको साकोस अभियानका लागि फलदायी हुने विश्वास संञ्चालक पौड्यालले व्यक्त गर्नुभएको छ ।  

भ्रमणमा ताइवानी केन्द्रीय बचत संघ-'कुलरक' सँगै विभिन्न क्रेडिट युनियनहरुको अवलोकन र अनुभव तथा समसामयिक विषयमा सिकाइ आदानप्रदान भएको उहाँले जानकारी गराउनुभयो । 

नेफ्स्कून सञ्चालक पौड्यालले पनि नेपालको साकोस अभियानका सम्बन्धमा प्रस्तुतीसँगै सहकारी क्षेत्रको आफ्नो लामो अनुभव सुनाउनुभएको थियो । 

उक्त भ्रमणमा नेपालसँगै फिलिपिन्स, थाइल्याण्ड र भारतीय क्रेडिट युनियनकर्मीहरुको सहभागिता थियो ।  सहभागीहरुबीच घनिष्ठ सम्बन्ध स्थापित भएको र एक अर्काका असल अभ्यासहरुबारे जानकारी आदानप्रदान भएको नेफ्स्कून सञ्चालक पौड्यालले जानकारी गराउनुभयो ।  'कुलरक' ले सन् २०१९ पछि पहिलो पटक 'एक्स्पोजर भिजिट' आयोजना गरेको हो ।