काठमाडौं । नेफ्स्कून विराटनगर सेवा केन्द्रको आयोजनामा व्यवसाय प्रबर्द्धनका लागि व्यवस्थापकसँग अन्तरक्रिया कार्यक्रम १७ साकोसबाट २४ जनाको उपस्थितिमा सम्पन्न भएको छ ।

नेफ्स्कून सञ्चालक एवम् संघको सुनसरी सेवा कार्यालय व्यवस्थापन उपसमिति संयोजक लक्ष्मी सापकोटाको अध्यक्षतामा आयोजित कार्यक्रममा उहाँले संघ सबैको निर्विकल्प अभिभावक भएको बताउनुभयो । उहाँले भन्नुभयो, ‘नेफ्स्कून सधैं सदस्यको मात्र हित चाहने स्वार्थरहित संघ हो । यो सधैं सदस्य संघ संस्थाको स्थायित्वप्रति चिन्तित रहन्छ ।’

उहाँले नेफ्स्कूनको वर्तमान सञ्चालक समिति तथा व्यवस्थापन साकोस अभियानको सुदृढीकरणप्रति लागि परेको विश्वास सहभागीहरुलाई दिलाउनुभयो । साकोस अभियान कमजोर होस् भन्ने कामना गर्नेहरु नेफ्स्कूनको विरोधमा हुनु आश्चार्यको विषय नभएको समेत उहाँले उल्लेख गर्नुभयो ।

सोही कारण सबै संघ संस्थाहरुले आ–आफ्नो स्थानबाट साकोस अभियानलाई सबल र सुदृढ बनाउन योगदान गर्नुपर्ने आवश्यकता उहाँले औंल्याउनुभयो ।

यसैगरी, सञ्चालक सापकोटाले नेफ्स्कून साकोस अभियानको राष्ट्रिय तथा अन्तर्राष्ट्रिय सञ्जालको विश्वासपात्र भएको समेत दाबी गर्नुभयो । साकोस अभियानको डिजिटलाइजेसनबारे सञ्चालक सापकोटाले भन्नुभयो, ‘मिरा इआरपीबाट अब सबै समाधान दिने प्रयास भैरहेको छ ।’

कार्यक्रममा उहाँले आसन्न बडा दशैं, दिपावली, छठ, नेपाल सम्वत्को शुभकामना समेत दिनुभएको थियो ।

कार्यक्रमको विषयवस्तुमाथि संघको सुनसरी सदस्य सेवा कार्यालय प्रमुख रामकृष्ण भट्टराईले प्रस्तुतीकरण गर्नुभएको थियो ।  कार्यक्रम संचालन नेफ्स्कून विराटनगर सेवा केन्द सेवा केन्द्र ईन्चार्ज लक्षमण अधिकारीले गर्नुभएको थियो ।