नवलपरासी । नेफ्स्कून भुमही सेवा केन्द्रको आयोजनामा आज साकोस सिद्धान्त र संस्कृति अनुशिक्षण कार्यक्रम सम्पन्न गरिएको छ । नेफ्स्कून सञ्चालक एवम् रुपन्देही सदस्य सेवा कार्यालयकी संयोजक ज्ञानु पौड्यालको अध्यक्षतामा आयोजित कार्यक्रममा नवलपरासी जिल्ला बचत तथा ऋण सहकारी संघ लि.का अध्यक्ष राजन आचार्य प्रमुख अतिथि रहनुभएको थियो ।

कार्यक्रममा नेफ्स्कून सञ्चालक पौड्यालले सदस्यहरुको आवश्यकता अनुरुप संघले तालिम, शिक्षाका कार्यक्रमहरु सञ्चालन गर्दै आएको भन्दै समय सान्दर्भिक कार्यक्रमहरु संस्था सञ्चालनमा सहयोगी भएको दाबी गर्नुभयो । उहाँले नेफ्स्कूनको गुणस्तर सुनिश्चिततासँग जोडिएको स्तरीकरण कार्यक्रमदेखि साकोस अभियानको जगेडा कोष स्थिरीकरण कोष र त्यसमार्फत जोखिम सुपरिवेक्षणका विषयहरुमा प्रकाश पार्नुभएको थियो ।

कार्यक्रममा प्रमुख अतिथि जिल्ला बचत संघका अध्यक्ष आचार्यले नेफ्स्कूनले आयोजना गरेका तालिमहरु प्रभावकारी हुने भन्दै तिनमा सहभागी हुनुपर्ने धारणा राख्नुभयो । उहाँले सहकारी र साकोस सिद्धान्तहरुका बारेमा जानकारी राख्दाराख्दै पनि कतिपय सन्दर्भमा सैद्धान्तिक र व्यावहारिक एकरुपताका लागि यस्ता तालिम र सिकाइ कार्यक्रमहरु उपयोगी हुने बताउनुभयो ।

१८ साकोसबाट २३ जनाको सहभागिता रहेको कार्यक्रमको सञ्चालन नेफ्स्कून रुपन्देही सदस्य सेवा कार्यालय प्रमुख कल्पना भण्डारीले गर्नुभएको थियो भने कार्यक्रमको सम्बन्धमा भुमही सेवा केन्द्र प्रमुख नेत्र प्रसाद सापकोटाले प्रस्तुतीकरण गर्नुभएको थियो ।