काठमाडौं । धादिङ, नीलकण्ठ नगरपालिका ८, स्थित रामकोट बचत तथा ऋण सहकारी संस्थाले भावी सञ्चालक तथा सहकारी संस्थामा कुशल नेतृत्व विकास गर्ने उद्देश्यका साथ पूर्व नेतृत्व विकास तालिम सञ्चालन गरेको छ । 

शनिबार आयोजित तालिममा सहकारी सञ्चालनको सैद्धान्तिक ज्ञान, सहकारी ऐन, नियमाली, निर्देशन र मार्गदर्शनमा सहकारी सञ्चालन तथा कारोबारका सम्बन्धमा भएका व्यवस्था बारे सहकारी प्रशिक्षक कुबेर निरौलाले जानकारी गराउनुभएको थियो ।

त्यसैगरी शेयर सदस्य, सञ्चालक समिति, विभिन्न उपसिमिति, लेखा सुपरिवेक्षण समितिको काम, कर्तव्य र अधिकार, नेतृत्व र नेतृत्वका आधारभूत गुणहरु बारे जानकारी गराइएको थियो ।

सहकारीमा जोखिम र जोखिम व्यवस्थापनमा सदस्य, सञ्चालक, लेखा सुपरिवेक्षण समिति र कर्मचारीको भूमिका, प्रभावकारी कार्यकुशलताका लागि समूह कार्यको भूमिका तथा भावी सञ्चालक छनौटमा साझा बुझाइको विकास गराउने उद्देश्यले कार्यक्रमको आयोजना गरिएको संस्थाका अध्यक्ष रामकृष्ण श्रेष्ठले बताउनुभयो।

तालिम समापन कार्यक्रममा नेपाल बचत तथा ऋण केन्द्रीय सहकारी संघ लि. (नेफ्स्कून) का कोषाध्यक्ष दीपक थापाको प्रमुख आतिथ्यता तथा नेफ्स्कून निवर्तमान सञ्चालक गोमा नेपालको विशिष्ट आतिथ्यता थियो ।

४० जनाको सहभागिता रहेको तालिमको उद्घाटन धादिङ जिल्ला बचत तथा ऋण सहकारी संघका अध्यक्ष नवराज शर्माले गर्नुभएको थियो । उद्घाटन सत्रका नीलकण्ठ ८ का वडा अध्यक्ष तथा संस्थाका संस्थापक अध्यक्ष हेमराज श्रेष्ठ लगायतको आतिथ्यता थियो ।