काठमाडौं । नेफ्स्कूनका वरिष्ठ उपाध्यक्ष दामोदर अधिकारीले सहकारी संस्थाले योजना निर्माण गर्दा सदस्यहरुलाई केन्द्रमा राखेर तयार गर्नुपर्ने बताउनुभएको छ । साथै उहाँले योजना तय गर्दा वृद्धिलाई भन्दा गुणस्तरलाई ध्यान दिन पनि सुझाउनुभयो ।

सुर्खेतस्थित शिखर बचत तथा ऋण सहकारी संस्था लि.को रणनितिक व्यवसायिक योजना निर्माण कार्यशालाको उद्घाटन सत्रमा उहाँले संस्थाले निर्माण गर्न लागेको ४ वर्षे योजनाले अबका दिनमा संस्था कसरी सञ्चालन गर्ने भन्ने दिशा तय गर्ने भएकाले संस्थाको ध्येय, परिकल्पना, लक्ष्य र उद्देश्य सदस्यहरुलाई सम्झेर तय गर्नु पर्ने धारणा राख्नुभयो ।

संस्थाका अध्यक्ष भुपेन्द्र बहादुर सिंहको अध्यक्षतामा आयोजित उद्घाटन सत्रमा नेफ्स्कूनका बरिष्ठ उपाध्यक्ष अधिकारीले भन्नुभयो, ‘योजना निर्माण गर्दा ४ वटा कुरालाई हेर्नुहोला, ‘सदस्यहरु कस्ता होला ? कर्मचारी कस्ता होलान् ? सञ्चालकहरु कस्ता होलान् ? संस्थाको सेवा व्यवसाय कस्तो होला ?’ 

नेफ्स्कूनको प्राविधिक सहयोग श्रावण १३ गतेदेखि सुरु भएको कार्यशाला १६ गते सम्म सञ्चालन हुनेछ । कार्यक्रममा संस्थाका कानुनी परामर्शदाता अधिवक्ता पूर्ण प्रसाद ढकालले अबको ४ वर्ष संस्था कसरी चल्ने भन्ने कुरा आज नैै दिशा निर्देश गर्ने भएकोले रणनीतिक योजना निर्माणमा सवैको सक्रिय सहभागिता आवश्यक हुने बताउनुभयो । उहाँले संस्था सञ्चालनमा सवैको टिमवर्क हुनु पर्ने र हरेका क्रियाकलाप गर्दा नितिगत व्यवस्था अनुसार गर्नुपर्ने उल्लेख गर्नुभयो । 

नेफ्स्कूनका तालिम अधिकृतद्वय  कोमल राज अधिकारी र रविन्द्र श्रेष्ठको सहजीकरण रहेको तालिमको उद्घाटन सत्रमा संघको सदस्य सेवा कार्यालय नेपालगञ्जका इन्चार्ज छत्र धमला पनि अतिथि रहनुभएको थियो । तालिममा  ४ महिलासहित १४ जनाको सहभागिता रहेको छ ।