काठमाडौं । अमेरिकाको बोस्टन शहरमा आयोजना हुने विश्व ऋण परिषद् (ओकू) को वार्षिक साधारण सभामा सहभागिताका लागि नेफ्स्कूनका अध्यक्ष चन्द्रप्रसाद ढकाल र प्रमुख कार्यकारी अधिकृत (सिईओ) डा. शिवजी सापकोटा आज अमेरिका जाँदै हुनुहुन्छ ।

उहाँहरुलाई भ्रमण सफलताको शुभकामनासहित आज केन्द्रीय कार्यालयमा संघका बरिष्ठ उपाध्यक्ष दामोदर अधिकारी, सञ्चालकहरु सुशिल कुमार बस्न्यात र खेमराज सुवेदी, निवर्तमान लेखा सुपरिवेक्षण समिति संयोजक नवराज सापकोटासँगै सहायक कार्यकारी अधिकृतहरु लगायतले बिदाइ गर्नुभएको थियो । 

ओकूको आयोजनामा यही जुलाई २१ देखि २४ सम्म बोस्टन शहरमा हुने  विश्व क्रेडिट युनियन सम्मेलन-२०२४ (World Credit Union Conference 2024) ताका जुलाई २२ मा ओकूको साधारण सभा हुँदैछ ।

ओकूको प्रत्यक्ष सदस्यको नाताले नेफ्स्कूनले साधारण सभामा सहभागिता जनाउँदै आएको छ । यो सँगै ओकू सञ्चालक समिति सदस्यमा पनि नेफ्स्कूनले उमेदवारी सहित आफ्नो दाबेदारी प्रस्तुत गरेको छ ।

नेपाली सहकारी अभियानमात्र नभई दक्षिण एशियाली क्रेडिट युनियनकै एकमात्र प्रतिनिधिको रुपमा नेफ्स्कूनका अध्यक्ष ढकालले ओकू सञ्चालक सदस्यमा उम्मेदवारी दिनुभएको छ । ओकू बोर्डमा यो वर्ष रिक्त ४ जना सञ्चालक पदको लागि ५ जनाको उमेदवारी परेको छ ।  

यसैबीच, बिदाइ कार्यक्रममा नेफ्स्कूनका बरिष्ठ उपाध्यक्ष अधिकारी लगायले अध्यक्ष ढकाललाई आसन्न निर्वाचनमा समेत सफलताको शुभकामना दिदैं ओकूको बोर्डमा उम्मेदवारी दिनु समग्र अभियानकै लागि गौरवको विषय भएको भन्दै विजयको शुभकामना व्यक्त गर्नुभएको थियो । नेफ्स्कून सन् २०१८ देखि ओकूको प्रत्यक्ष सदस्य रहँदै आएको छ ।