काठमाडौं । मुलुकभरका सहकारी संस्थाहरु यतिबेला आर्थिक वर्षान्तलाई सुखद र सकारात्मक बनाउने हरसम्भव प्रयासमा छन् । सदस्यहरुबाट संकलित रकम सदस्यहरुमै गरिएको परिचालनलाई समयमै फिर्ता गरी सदस्यहरुकै संस्थाको वित्तीय अवस्थालाई सबल बनाउने काममा दिनरात नभनी सहकारीहरु लागिपरेका छन् ।

पछिल्लो समय मुलुकको संकुचित आर्थिक अवस्था, सहकारी संस्थाप्रति सुनियोजित रुपमा फैलाइएको अफवाह, ऋण तिर्नुपर्दैन भन्ने भ्रामक प्रचारबाजी र सदस्यहरुको उद्योग व्यवसायमा परेको प्रतिकुल असर आदिका कारण समयमै शर्तानुसार ऋण उठ्न कठिनाइ भइरहेको छ ।

खासगरी आफूले लिएको ऋण तिर्न सक्ने अवस्था भएका सदस्यहरुले जानीबुझी अटेर गरेका कारण सहकारी संस्थाहरु थप मारमा परेका छन् । बुझ पचाएर ऋण नतिर्ने सदस्यहरुका कारण आफ्नै संस्थाका अन्य सदस्यहरुको बचत जोखिममा पार्ने काम सदस्यहरुबाट भएकाले पनि सहकारीहरु समस्यामा परेको अवस्था छ ।

वर्षभरिको वित्तीय कारोबारको अवस्थासँगै संस्थाको सक्षमता र सफलताको परिमाणात्मक मापनको सन्निकट यस्ता गतिविधिले सहकारी समस्यामा परेको सर्वविदितै छ । 

यस्तो परिस्थितिमा, सबैजसो सहकारी संस्थाहरुले ऋणी तथा जमानी सदस्यहरुलाई ऋण लिदाँको शर्तबारे सचेत तुल्याउने, कानूनी प्रबन्धहरु स्मरण गराउने र समयमै ऋणी तिर्दा हुने फाइदा र नतिर्दा निम्तने जोखिमबारे विभिन्न जनचेतनामूलक एवम् प्रचारात्मक सामाग्रीहरु आफ्ना सामाजिक सञ्जालबाट प्रकाशन तथा प्रसारण गरिरहेका छन् ।

यस्तैमा, बनेपा ७ काभ्रेस्थित एक्सप्रेस साकोसले संस्थाका ऋणी तथा जमानी सदस्यहरुका नाममा एउटा भावुक पत्र सार्वजनिक गरेको छ ।

पत्रमा साकोसले भनेको छ, ‘एकपटक सम्झनुहोस् त, ऋण लिदाँको बखत तपाईले के भनेर, के शर्तमा लिनुभएको थियो ? अनि आफ्नै बोली र शर्तको परिपालना गर्नुभयो त तपाईले ? तपाईले लिनुभएको कर्जा ती संयौं खाई नखाई बचत गर्ने सदस्यहरुको एकमुष्ट रकम हो ।'

यस्तै, आशयको सूचना अन्य सहकारी संस्थाहरुले पनि जारी गरी त्यस्ता सदस्यहरुलाई सम्पर्कमा आउन, संस्थासँग समन्वय गर्न र वातावरणलाई सहज पार्न आग्रह गरेका छन् । 

यस्तै, मुलुकभरकै स्थानीय तहरुले पनि सहकारीका ऋणी सदस्यहरुलाई समयमै ऋण तिर्न अन्थया कानून बमोजिम कारबाहीका लागि तयार हुन सूचना जारी गरेका छन् ।