सन्धिखर्क । अर्घाखाँची जिल्ला बचत तथा ऋण सहकारी संघको आयोजनामा आज सन्धिखर्कमा सहकारी अभियानका साझा समसामयिक विषयवस्तु तथा सवालमा अन्तरक्रियासँगै वार्षिक खाताबन्दीका विषयमा तालिम आयोजना गरिएको छ । नेफ्स्कूनका अध्यक्ष चन्द्रप्रसाद ढकालको प्रमुख आतिथ्यतामा भएको अन्तरक्रियामा संघकी सञ्चालक ज्ञानु पौड्याल तथा सहायक कार्यकारी अधिकृत सञ्जयराज तिमिल्सिना सहभागी हुनुभएको थियो । नेफ्स्कून नेतृत्वमा साकोस अभियानका समसामयिक विषयवस्तुमा भैरहेका बहसपैरवीबारे संघका अध्यक्ष ढकालले जानकारी गराउनुभएको थियो ।

यसैगरी, अध्यक्ष ढकाल तथा सञ्चालक सदस्य पौड्यालले अर्घाखाँची जिल्लाको साकोस अभियानको चासो र अपेक्षाहरु ग्रहणसँगै तिनको सम्बोधनका लागि संघले गर्ने प्रयासबारे जानकारी गराउनुभएको थियो । कार्यक्रममा उहाँहरुले सहभागीहरुको जिज्ञासाको सम्बोधन समेत गर्नुभएको थियो । 

नेफ्स्कूनको प्राविधिक सहयोगमा सञ्चालित उक्त कार्यक्रममा संघका सहायक कार्यकारी अधिकृत तिमिल्सिनाले बार्षिक खाताबन्दीलाई कसरी प्रभावकारी बनाउने, वासलातको शुद्धता कसरी कायम गर्ने र खाताबन्दी गर्दा ध्यान पुर्याउनुपर्ने विषयहरुमा सहभागी जिल्ला संघ तथा प्रारिम्भक संस्थाका प्रतिनिधिहरुलाई प्रशिक्षित गर्नुभएको थियो ।