भक्तपुर । नेफ्स्कून भक्तपुर सदस्य सेवा कार्यालयले ६७औं राष्ट्रिय सहकारी दिवस एक कार्यक्रम आयोजना गरी मनाएको छ । सहकारीमा सुशासन स् प्रविधि र एकीकरण भन्ने यस वर्षको सहकारी दिवसको थिममा आधारित रही आयोजित कार्यक्रममा सदस्य सेवा कार्यालय अन्तर्गतका सदस्य संस्थाहरुको सहभागिता रहेको थियो । कार्यक्रममा जिल्ला बचत संघ भक्तपुर सहित १७ वटा संस्थाहरु सहभागी भएका थिए भने संघको भक्तपुर सदस्य सेवा कार्यालय र सूर्यविनायक सदस्य सेवा कार्यालयका कर्मचारीको पनि उपस्थिति रहेको थियो ।

कार्यक्रममा नेफ्स्कून सञ्चालक एवम् भक्तपुर सदस्य सेवा कार्यालय संयोजक मन्दरा मिश्रले संघको सञ्चालक समितिको १ सय दिन पुरा भएको अवसरमा जारी गरिएको प्रेस विज्ञप्ति वाचन गरी त्यस विषयमा थप प्रस्ट पार्नुभएको थियो । उहाँले संघको सञ्चालक समितिले निर्वाचित भइसकेपछि प्राप्त गरेका उपलब्धि, भएका बहसपैरवी र अघि बढाइएका कामहरु आदिबारे जानकारी गराउँदै सदस्य संघ संस्थाहरुको राय लिई आगामी दिनमा थप उपलब्धि हासिल गर्ने विश्वास व्यक्त गर्नुभयो । उहाँले सदस्यहरुको भावना प्रतिविम्बित हुने गरी नेफ्स्कूनले काम गर्नेमा सबैलाई आश्वस्त तुल्याउनुभयो ।

प्रेस विज्ञप्ति प्रस्तुत गरेर त्यसैमा अन्तरक्रिया कार्यक्रम गरिएको र सहभागीहरुको जिज्ञासा एवं गुनासको मन्दरा मिश्रद्वारा सम्बोधन गरिएको । संघका कार्यक्रम अधिकृत पेशल कुमार खड्काले स्वागत मन्तव्य राख्नुभएको कार्यक्रमको सञ्चालन नेफ्स्कून भक्तपुर सदस्य सेवा कार्यालय प्रमुख कल्पना पराजुलीले सञ्चालन गर्नुभएको थियो ।