काठमाडौं । नेफ्स्कून सदस्य सेवा कार्यालय डडेल्धुराको आयोजनामा फागुन २६ गतेदेखि २८ गतेसम्म डडेल्धुरामा पर्ल्स अनुगमन प्रणाली तालिम सञ्चालन गरिएको छ । तालिममा सुदुर पश्चिम प्रदेशका कञ्चनपुर, डडेल्धुरा, बैतडी, दार्चुला, डोटी र अछाम गरी ६ जिल्लाका २६ सहकारीका २९ जनाको सहभागिता थियो । 

तालिम समापनमा सहभागीहरुले महत्वपूर्ण सिकाइ भएको र सिकाइलाई संस्थाको वित्तीय सूचक परीक्षण गरी संस्थागत विकासमा लागू गर्ने प्रतिबद्धता व्यक्त गर्नुभएको थियो । 

उद्घाटन कार्यक्रममा राष्ट्रिय सहकारी महासंघका निवर्तमान सञ्चालक एवं डडेल्धुरा बचत संघका अध्यक्ष पदमा गुरुङ्गले पर्ल्स अनुगमन प्रणाली तालिमले वित्तीय सहकारीको ऐना जस्तै वित्तीय अवस्था देखाउने भएकाले तालिम पश्चात आफ्नो सहकारीको वित्तीय अवस्था चेक गरी संस्थागत सजगतामा ध्यान दिन आग्रह गर्नुभयो । 

नेफ्स्कूून सञ्चालक दिप्ती शाहीले संस्थालाई सवल र सक्षम बनाउन तालिमको महत्व हुने भएकाले सदस्यलाई सक्षम बनाउन तालिम आयोजना गरिएको बताउनु भयो । सदस्य संस्थाहरुको विकास र साकोस अभियानलाई मजबुत बनाउन नेफ्स्कून हरदम प्रयत्नशील रहेको उहाँले बताउनु भयो । सहकारीकर्मीहरुले समय अनुसार अद्यावधिक भइ रहनु पर्ने बताउदै सञ्चालक शाहीले संस्थालाई नीति, विधि र प्रविधि अनुसार सञ्चालन गर्नुपर्ने बताउनु भयो । उहाँले सदस्य संस्थाहरुको सक्षमता विकासका तालिम तथा कार्यक्रम आयोजना गरिने भन्दै संस्थालाई समस्या परेको समयमा सहयोग गर्न नेफ्स्कून तयार रहेको प्रतिवद्धता ब्यक्त गर्नुभयो ।

सुदुर पश्चिम बचत संघका सञ्चालक अमर बहादुर पुनले वर्तमान कठिन समयमा सहकारीहरु सुशासनमा चल्नु अति नै आवश्यकता रहेको, सुशासनमा नचल्ने संस्था दिगो हुन नसक्ने, सहकारीको वित्तीय अवस्था ठिक हुनु पर्ने तथा सो का लागि वित्तीय सूचक बिश्लेषण गर्न सक्ने जनशक्ति आवश्यक हुने बताउनु भयो । दक्षता हासिल गर्नका लागि पल्र्स तालिमले महत्वपुर्ण सिकाइ हुने उहाँले बताउनु भयो । 
नेफ्स्कूनको सदस्य सेवा कार्यालय डडेल्धुराका इन्चार्ज धर्मराज जोशीले सदस्य संस्थाहरुको माग सम्बोधन हुने गरी तालिमका कार्यक्रमहरु राख्दै आएको भन्दै आगामी दिनमा पनि सदस्य संस्थाहरुलाई नै ध्यानमा राखेर तालिम र शिक्षा कार्यक्रमहरुमा जोडिने जानकारी गराउनुभएको थियो ।

३ दिने तालिम सहजीकरण नेफ्स्कूनका तालिम अधिकृत श्यामराजा तिमल्सिनाले गर्नुभएको थियो । तालिमको समग्र व्यवस्थापन संघको डडेल्धुरा सदस्य सेवा कार्यालयका इन्चार्ज धर्मराज जोशीले गर्नुभएको थियो ।