काठमाडौं । सुनसरीको इटहरी-१६ स्थित किसान कल्याण साकोसका सञ्चालकहरुले फाल्गुन २३ देखि २६ गतेसम्म गाईघाटमा सञ्चालित सीयूडीसीसी तालिम धेरै व्यावहारिक भएको भन्दै सिकाइ संस्थामा लागू गर्ने प्रतिवद्धता व्यक्त गर्नुभएको छ । नेफ्स्कूनको प्राविधिक सहयोगमा सञ्चालित 'साकोस सञ्चालकहरुको क्षमता अभिवृद्धि तालिम' (सीयूडीसीसी) साँच्चिनै उपयोगी भएको भन्दै किसान कल्याण साकोसका सञ्चालकहरुले धेरै विषयहरुमा थप स्पष्टता भएको बताउनुभएको हो । 

साकोसका उपाध्यक्ष नरेन्द्र कुमार श्रेष्ठले तालिममा सिकेका कुरा संस्थामा लागु गर्दै सदस्यहरुको आर्थिक सामाजिक समृद्धिमा केन्द्रीत, प्रतिस्पर्धी र सर्वोत्तम छनोटको वित्तीय संस्था निर्माणमा लाग्ने प्रतिवद्धता व्यक्त गर्नुभयो । उहाँले समितिको बुझाइ र कर्मचारीको बुझाइमा समानताको लागि तालिममा उच्च व्यवस्थापनको सहभागिता रहेको स्पष्ट पार्नुभयो ।

साकोसकी शिक्षा, तालिम तथा सूचना उपसमिति संयोजक गितादेवी अधिकारीले भन्नुभयो, ‘तालिममा धेरै व्यवहारिक शिक्षा सिक्ने अवसर प्राप्त भयो । सिकाइ संस्थामा लागु गर्ने प्रतिवद्धता व्यक्त गर्छौं ।’  सुन्दर सेवा केन्द्र संयोजक समेत रहनुभएका अर्का सञ्चालक कृष्ण प्रसाद लम्सालले भन्नुभयो, ‘सहज र सौहार्दपूर्व वातावरणमा सहजीकरण भयो । तालिम व्यवहार उपयोगी पनि रह्यो । यसले हाम्रो साँच्चिकै क्षमता अभिवृद्धि भएको छ । यसमा सिकेका कुरा संस्थामा लागू गर्ने प्रण गर्छौं ।’ तालिममा साकोसका २६ जनाको सहभागिता थियो ।

२३ हजार बढी सदस्य रहेको किसान कल्याण साकोसको कूल सम्पत्ति १ सय ३४ करोड बढी छ भने संस्थाको मात्र हक लाग्ने पूँजी ९ करोड १७ लाख बढी छ । साकोस नेफ्स्कूनले एशियाली ऋण महासंघ (अकू) को प्राविधिक सहयोगमा सञ्चालन गरेको साकोसहरुको गुणस्तर सुनिश्चिततासम्बन्धी एशिया स्तरको स्तरीकरण कार्यक्रम एक्सेसमा सहभागी छ । तालिम सहजीकरण नेफ्स्कूनका सहायक कार्यकारी अधिकृत गणेश तिमल्सिना र तालिम अधिकृत उमेश कोइरालाले गर्नुभएको थियो ।

त्यस्तै, तालिममा उत्साह बढाउन अन्तिम दिन उपस्थित हुनुभएका राष्टिय सहकारी महासंघका सञ्चालक नथुनी यादवले किसान कल्याण पूर्वी जिल्लाहरुको अब्वल संस्था रहेकोमा खुसी व्यक्त गर्दै सिकाइ संस्थामा लागु गर्ने विश्वास व्यक्त गर्नुभयो । देशको अर्थतन्त्रमा सहकारीको योगदान महत्वपूर्ण रहेको भन्दै सहकारीले न्यून आय भएका व्यक्तिको आर्थिक सामाजिक जीवनस्तरमा सुधार भूमिका निर्वाह गरेको उहाँले बताउनुभयो । यद्यपि, विश्वव्यापी आर्थिक मन्दीको असर सहकारीमा परेको र केही सहकारीले सदस्यको पैसा फिर्ता दिन नसकेको असहज परिस्थितिमा सवै पक्ष मिलेर अघि बढ्नुपर्ने धारणा उहाँको थियो । साकोसका सचिव महेश कुमार रेग्मीले स्वागत गर्नुभएको थियो ।