नवलपरासी (ब.सु.पूर्व) स्थित मध्य नेपाल बचत तथा ऋण सहकारी संस्था लि. को आयोजना एवम् नेफ्स्कूनको प्राविधिक सहयोगमा चितवनको माडीमा 'साकोस संचालकहरुको क्षमता अभिबृद्धि तालिम-CUDCC' फागुन १८ गते सुरु भई २१ गते सम्पन्न भएको छ ।

उक्त उच्चस्तरीय तालिमले संचालक तथा व्यवस्थापनमा नयाँ उर्जा संचार गराउन, संस्थाका आन्तरिक कार्यविधिहरू संशोधन गर्न, व्यावसायिक योजना बनाउन, रणनीतिक योजना तयार गर्न लगायत जोखिम मापन गर्दै संस्थालाई सरल र सहज ढंगबाट निरन्तरता प्रदान गर्न सहयोग पुर्‍याउने अपेक्षा गरिएको मध्य नेपाल साकोसले जनाएको छ । तालिममार्फत समग्रतामा संचालकहरुको क्षमता अभिवृद्धि मुख्य उद्देश्य भएको साकोसको भनाइ छ । 

तालिम कार्यक्रम उद्घाटन संस्थाका अध्यक्ष तुलमणी पौडेलले गर्नु भएको थियो भने प्रमुख अतिथि नेफ्स्कून उपाध्यक्ष शान्ति अधिकारी रहनुभएको थियो । बिशेष अतिथिमा देवचुली नगरपालिका नगर प्रवक्ता एवम् देवचुली नगरपालिका वडा-११ का वडाध्यक्ष तथा संस्थाका सल्लाहकार तिल प्रसाद काफ्ले रहनु भएको थियो । यस्तै, अतिथि एवम् प्रशिक्षकमा नेफस्कूनका सहायक कार्यकारी अधिकृत एवम् प्राचार्य संजयराज तिमिल्सिना र तालिम अधिकृत रविन्द्र श्रेष्ठ रहनु भएको थियो ।

तालिममा साकोसको संचालक समिति, लेखा सुपरिवेक्षण समिति, सल्लाहकार, ऋण उपसमिति, शिक्षा उपसमिति, सेवाकेन्द्र व्यवस्थापन उपसमितिका संयोजक एवम् सह संयोजक साथमा कर्मचारी गरी २९ जनाको सहभागिता रहेको  थियो । समापनमा सहजकर्ता तिमिल्सिनाले सहभागीहरुलाई प्रमाण पत्र प्रदान गर्नुभएको थियो । संस्थाका अध्यक्ष पौडेल, नगर प्रवक्ता एवम् सल्लाहकार तिल प्रसाद काफ्ले  र नेफ्स्कूनका प्राचार्य तिमिल्सिनाले मन्तव्य राख्नुभएको थियो । समापन कार्यक्रम संस्थाका सचिव डिलाराम पाण्डेले सहजीकरण गर्नुभएको थियो ।