काठमाडौं । नेफ्स्कून भक्तपुर सदस्य सेवा कार्यालयको आयोजनामा ऋण व्यवस्थापन तथा सुरक्षित ऋण परिचालन तालिम आज सम्पन्न भएको छ । तालिममा १४ महिलासहित कुल ४२ जनाको सहभागिता रहेको थियो । तालिममा ऋणको परिचय, ऋण सेवाका आधारभूत सिद्धान्त र ऋण वर्गीकरण तथा ऋणको पोर्टफोलियो व्यवस्थापन र ऋण लगानी प्रक्रिया, ऋण लगानीका लागि आवश्यक कागजात तथा ऋण लगानीका कानुनी आधार, क्षमतामा आधारित ऋण लगानी तथा ऋण लगानीको प्राथमिकता र सुरक्षित ऋण लगानीका आधारहरुबारे सहजीकरण गरिएको थियो ।

कार्यक्रम समापनमा नेफ्स्कूनकी सञ्चालक सदस्य मन्दरा मिश्रले प्रारम्भिक संस्था दिगो हुनु भनेको नेफ्स्कून दिगो हुनुभएकाले आफ्ना सदस्यहरुलाई सबल बनाउन निरन्तर तालिम र शिक्षाका कार्यक्रमहरु आयोजना गरिएको बताउनुभयो । उहाँले भन्नुभयो, ‘नेफ्स्कून राम्रो हुन संस्थाहरु राम्रो हुनुपर्छ ।’ फल लागेको रुख मात्र राम्रो हुने भन्दै सञ्चालक सदस्य मिश्रले नेफ्स्कूनलाई रुखसँग र सदस्यहरुलाई फलसँग तुलना गर्नुभयो ।

नेफ्स्कूनका तालिम अधिकृत कोमलराज अधिकारीले सहजीकरण गर्नुभएको कार्यक्रमको समग्र व्यवस्थापन संयोजन तथा सञ्चालन संघको सदस्य सेवा कार्यालय भक्तपुरकी प्रमुख कल्पना पराजुलीले गर्नुभएको थियो ।