काठमाडौं । नेफ्स्कूनका अध्यक्ष चन्द्र प्रसाद ढकालले नेफ्स्कूनको नेतृत्व परिवर्तन केवल अनुहार परिवर्तन नभएको बताउनुभएको छ । पाल्पामा जारी एनएफआरएस तालिमका सहभागीहरुसँग हिजो बेलुका अन्तरिक्रया गर्दै उहाँले साकोस अभियानको साँच्चिकै शुद्धीकरण र रुपान्तरणका लागि नेतृत्व परिवर्तन भएको दाबी गर्नुभएको छ । उहाँले साकोस अभियानले वास्तवमै अनुभव गर्न सक्ने गरी नेफ्स्कूनको नयाँ सञ्चालक समितिले काम गर्ने विश्वास पनि दिलाउनुभयो । त्यसका लागि साकोस ब्यवस्थापनको बागडोर सम्हालेर बसेका अनि निखारिएका ब्यवस्थापकहरुको सल्लाह सुझाव लाई नेफ्स्कूनले ध्यान दिने बताउनुभयो ।

उहाँले हिजोका कमजोरीहरु सुधार्ने, राम्रा कामलाई निरन्तरता दिने र नवीन योजनाहरु अघि सारिने जानकारी पनि गराउनुभयो । साकोस व्यवस्थापकहरुलाई सदस्यहरुको हितमा काम गर्न, संस्थागत सुधारका कामहरुलाई अघि बढाउन, साकोस अभियानका सकारात्मक विषयहरु उजागर गर्न र समुदायमा सहकारीको अत्यावश्यकता बोध हुने गरी काम गर्न आग्रह गर्नुभयो । 

अन्तरक्रियामा सहभागी लुम्बिनी प्रदेश भित्रका करिब करिब डेढ दर्जन साकोस व्यवस्थापकहरुले नेफ्स्कूनले सदस्य संस्थाहरुलाई सहयोग पुग्ने गरी काम गर्नुपर्ने धारणा राख्नुभयो । उहाँहरुले साकोसहरुले अभिभावक छ भन्ने गरी काम गर्नुपर्ने बताउनुभएको थियो । आवश्यक पर्दा सल्लाह, सुझाव र सहकार्यका लागि सधैं तयार रहेको पनि उहाँहरुले विश्वस्त तुल्याउनुभयो ।  लुम्बिनी प्रदेश बचत तथा ऋण सहकारी संघको साधारण सभामा सहभागी हुन जाने क्रममा नेफ्स्कूनअध्यक्ष ढकाल केही समयका लागि तालिमका सहभागीहरुसँग अन्तरक्रियामा सहभागी हुनुभएको थियो । तालिम कार्यक्रममा सहभागी व्यवस्थापकहरुसँग अध्यक्ष ढकालले केही समय अभियानका समसामयिक विषयमा अन्तरक्रिया समेत गर्नुभएको हो ।

तालिम कार्यक्रममा सहभागी व्यवस्थापकहरुले अध्यक्ष ढकाललाई बधाई सहित कार्यकाल सफलताको शुभकामना व्यक्त गर्नुभएको थियो । उक्त संक्षिप्त कार्यक्रमको संयोजन कोलिय देवदह साकोस रुपन्देहीका व्यवस्थापक विनोद पराजुलीले गर्नु भएको नेफ्स्कून सदस्य सेवा कार्यालय रुपन्देहीका प्रमुख प्रकाश अधिकारीले साकोस आवाजलाई जानकारी गराउनुभयो । ३ दिने तालिम आज समापन हुँदैछ । तालिम सहजीकरण चार्टड अकाउन्टेन्ट प्रवीण बरालले गर्नुभएको छ ।