काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) को ३२औं वार्षिक साधारण सभा भोलि बिहान काठमाडौंमा शुरु हुँदैछ । नेपाल प्रज्ञा प्रतिष्ठानमा आयोजना पुस ७ र ८ गते हुने सभाका लागि व्यवस्थापन लगायत सबै तयारी पूरा भैसकेको छ । नेफ्स्कूनको निर्वाचनसहितको साधारण सभामा सहभागी हुन देशभरबाटै अधिकांश प्रतिनिधिहरु काठमाडौं आइसक्नुभएको छ भने उपत्यका आसपासका र बाँकी केही जिल्लाका भोलि बिहानसम्म आइसक्नुहुने बताइएको छ ।

साधारणसभाको कार्यक्रम अन्तर्गत पहिलो दिन भोलि उद्घाटन तथा बन्द सत्र रहेको छ भने दोस्रो दिन पर्सि निर्वाचन कार्यक्रम रहेको छ । उद्घाटन सत्रमा नेफ्स्कून सम्मान तथा पुरस्कारसँगै नेपाल सरकारको मान्यताप्राप्त प्रोबेशन ब्राण्ड घोषणा तथा प्रदान गर्ने कार्यक्रम रहेको छ । 

पुस ८ गते दोस्रो दिन निर्वाचनको कार्यक्रम रहेको छ । संघको यो साधारण सभाले आगामी ४ वर्षका लागि नयाँ सञ्चालक समिति तथा लेखा सुपरिवेक्षण समिति निर्वाचित गर्नेछ । २०७६ सालमा सम्पन्न संघको २८औं वार्षिक साधारण सभाद्वारा निर्वाचित वर्तमान सञ्चालक समिति तथा लेखा सुपरिवेक्षण समितिको ४ वर्षे कार्यकाल यसै वर्ष सकिने भएकाले नयाँ समितिका लागि पर्सि निर्वाचन हुन लागेको हो । नेफ्स्कूनमा १९ सदस्यीय सञ्चालक समिति तथा ३ सदस्यीय लेखा सुपरिवेक्षण समिति रहेको छ ।

निर्वाचनका लागि संघको निर्वाचन उपसमितिको कार्यालयले भोलि नै अन्तिम मतदाता नामावली प्रकाशन तथा प्रथम पटक उम्मेदवारको नामावली प्रकाशनसँगै उम्मेदवारविरुद्ध दाबी विरोध र निर्णय सम्मका कामहरु सम्पन्न गर्ने कार्यतालिका रहेको छ ।

कार्यालयले भोलि अपरान्ह प्रथम पटक मतदाता नामावली प्रकाशन गर्नेछ । उपसमितिले साधारण सभा आयोजना स्थल नेपाल प्रज्ञा प्रतिष्ठान, कमलादीस्थित कार्यालयको सूचनापाटीमा नामावली टाँस गर्ने कार्यक्रम छ । 

नेफ्स्कूनको निर्वाचन निर्देशिका २०७० (संशोधन २०७६) दफा ९ सँग सम्बन्धित निर्वाचन कार्यतालिका अनुसार उपसमितिले भोलि अपरान्ह प्रथम पटक मतदाता नामावली प्रकाशन गर्नेछ । निर्वाचन कार्यतालिका अनुसार प्रथम पटक प्रकाशित मतदाता नामावली उपर दाबी विरोध र संशोधन पेश गर्न १ घन्टाको समयावधि उपलब्ध गराइनेछ । कार्यालयले भोलि नै अपरान्ह अन्तिम मतदाता नामावली प्रकाशन गर्ने छ भने त्यसपछि उम्मेदवारको दरखास्तका लागि समय उपलब्ध गराउनेछ । तोकिएको समयभित्र प्राप्त उम्मेदवारको दरखास्तसहित कार्यालयले उम्मेदवारको प्रथम नामावली प्रकाशन गर्नेछ । उक्त नामावली उपर दाबी विरोध र निर्णयको काम सम्म भोलि सक्ने गरी कार्यालयले कार्यतालिका प्रकाशन गरेको छ । उम्मेदवारी फिर्तादेखि मतपरिणाम घोषणासम्मका बाँकी सबै काम पर्सिका लागि तय गरिएको छ ।