काठमाडौं । नेपाल सहकारी पत्रकार समाज (सीजेएन) को अध्यक्षमा पुनः काजी श्रेष्ठ निर्वाचित हुनुभएको छ । सीजेएनको आज काठमाडौंमा सम्पन्न १३औं बार्षिक साधारणसभाबाट सहकारी खबर डटकमका सम्पादक श्रेष्ठको अध्यक्षतामा ७ सदस्यीय कार्यसमिति निर्विरोध चयन भएको हो । श्रेष्ठ लगातार दोस्रो कार्यकालका लागि निर्विरोध अध्यक्ष चुनिनुभएको हो । समाजको उपाध्यक्षमा सहकारी सञ्चारका अर्जुन खतिवडा, सचिवमा विकास न्युजका सन्तोष रोकाया, सह सचिवमा मेरो लगानी डटकमकी सुधा देवकोटा र कोषाध्यक्षमा नेपाल पत्रका माधव कुमार खड्का चयन हुनुभएको हो । यस्तै, सदस्यहरुमा अर्थबजार डटकमकी नमिता दुलाल र बाह्रखरी डटकमका बलराम बुढाथोकी चुनिनुभएको हो । समाजको विधान अनुसार २ सदस्य पछि मनोनित गरिने नवनिर्वाचित अध्यक्ष श्रेष्ठले जानकारी दिनुभयो । नवनिर्वाचित कार्यसमितिलाई मुख्य निर्वाचन अधिकृत बिष्णु गिरीले प्रमाणपत्र प्रदान गर्नुभएको थियो । 

यसैबीच, नवनिर्वाचित अध्यक्ष श्रेष्ठले साकोस आवाजसँग कुरा गर्दै सहकारी पत्रकारितालाई थप मर्यादित, विश्वसनीय र गुणस्तरीय बनाउने दिशामा नयाँ कार्यसमितिले प्रभावकारी काम गर्ने बताउनुभयो । उहाँले सहकारी क्षेत्रका उदाहरणीय, असल र सकारात्मक पक्षहरुलाई थप उजागर गर्ने र कमीकमजोरीहरु औल्याउँदै गलत कार्यलाई सशक्त खबरदारी गर्ने पत्रकारिताको धर्म र मर्मलाई ख्यालमा राखी सिङ्गो सिजेएनले काम गर्ने बताउनुभयो । उहाँले सहकारी अभियान, सरकार र सदस्यबीच सेतुको काम गर्ने सिजेएनले सदस्यता वृद्धि, पत्रकारहरुको क्षमता अभिवृद्धि र पेशागत हित प्रवर्धनका विषयसँगै केही नवीन काम गर्ने पनि खुलासा गर्नुभयो ।  नवर्निवाचित अध्यक्ष श्रेष्ठले सबै सदस्यलाई साथमा लिएर 'टीम स्पिरीट' मा काम गर्ने प्रतिवद्धता व्यक्त गर्नुभयो ।