हेटौंडा । जिल्ला बचत तथा ऋण सहकारी संघ मकवानपुरको अध्यक्षमा कल्पना श्रेष्ठ लगातार दोस्रो कार्यकालका लागि निर्वाचित हुनुभएको छ । शनिबार सम्पन्न संघको १८औं वार्षिक साधारण सभा तथा ७औं अधिवेशनले श्रेष्ठको नेतृत्वमा नयाँ सञ्चालक समिति निर्वाचित गरेको हो । श्रेष्ठले ७९ मत प्राप्त गर्दा प्रतिद्वन्द्वी राजु गौतमले ३९ मत प्राप्त गर्नुभयो ।

यसैगरी उपाध्यक्षमा मिनाकुमारी चौंरेले विजयी हुनुभयो । चौंरेले ८२ मत प्राप्त गर्दा प्रतिद्धन्द्धी सितादेवी भेटवालले ३५ मत प्राप्त गर्नुभयो । त्यस्तै सचिवमा विरेन्द्रप्रसाद ढुङ्गाना ७५ प्राप्त गरी विजयी हुनुभयो । उहाँका प्रतिद्वन्द्वी हरिप्रसाद पौडेलले ४३ मत प्राप्त गर्नुभयो । सहसचिव विजयबहादुर बस्नेत विजयी हुनुभयो । बस्नेतले ६८ मत प्राप्त गर्दा चुडामणी रुपाखेतीले ४४ मत प्राप्त गर्नुभयो ।  यसैगरी कोषाध्यक्ष पदमा विष्णुमाया लामा ८० मत प्राप्त गरी निर्वाचित हुनुभयो भने प्रतिद्वन्द्वी ध्रुवप्रसाद देवकोटाले ३८ मत प्राप्त गर्नुभयो । त्यस्तै सदस्यहरुमा शर्मिला महत, सिताराम दाहाल, फणिन्द्रनाथ सुवेदी, शंकर कालाखेती, हिमाल पौडेल, यशोदा पराजुली, जुना दंगाल, जानुका चौधरी विजयी हुनुभएको छ । संघको लेखा समिति संयोजकमा मिठाराम दहाल ६७ मत प्राप्त गरी विजयी हुनुभयो । यसैगरी लेखासमिति सदस्यमा कृष्ण विडारी ५१ मत र सचिता भट्टराई ७३ मत प्राप्त गरी विजयी हुनुभएको छ । कल्पना श्रेष्ठको अध्यक्षतामा भएको सभामा बागमती प्रदेश सामाजिक विकास मन्त्री कुमारी मोक्तान प्रमुख अतिथि रहनुभएको थियो ।