फिलिपिन्सको राजधानी मनिलामा जारी अन्तर्राष्ट्रिय सहकारी महासंघ–आईसीएको एसिया प्रशान्त क्षेत्रीय कार्यालय आईसीए एपीको १६औं साधारण सभाको साइडलाइनमा आज वित्तीय सहकारीहरुबारे छलफल भएको छ । आईसीए एपीमा सदस्यको रुपमा बैठकमा नेफ्स्कूनकोतर्फबाट बरिष्ठ उपाध्यक्ष चन्द्रप्रसाद ढकाल, सञ्चालक हरेराम पटेल र प्रमुख कार्यकारी अधिकृत डा.शिवजी सापकोटा सहभागी हुनुहुन्छ । आइसीए एपीको साधारण सभामा राष्ट्रिय सहकारी महासंघ नेपालका अध्यक्ष मिनराज कडेल, बरिष्ठ उपाध्यक्ष ओमदेवी मल्ल, राष्ट्रिय सहकारी बैंकका अध्यक्ष केबी उप्रेती पनि सहभागी हुनुहुन्छ ।

आजको छलफलमा संयुक्त राष्ट्र संघले सन् २०३० सम्मका लागि तय गरेको १७ वटा विकासात्मक लक्ष्य हासिल गर्न वित्तीय सहकारीले हालसम्म खेलेको भूमिका, चुनौतीहरु र भावी रणनीतिबारे छलफल जारी रहेको छ । वित्तीय सहकारी सञ्चालनका विविध पक्षबारे पनि छलफल हुने आइसीए एपीको आधारिक सामाजिक सञ्जालमा उल्लेख गरिएको छ । नोभेम्बर ६ बाट १० सम्मका लागि आयोजित आईसीए एपीको १६औं साधारण सभा अन्तर्गत साइडलाइनमा विभिन्न कार्यशाला र बैठकहरु भएका हुन् । साधारण सभाको कार्यक्रम भने भोलि आयोजना हुनेछ । 

सभाकै सेरोफेरामो नोभेम्बर ३ देखि ५ सम्म क्षेत्रीय युवा कार्यशाला आयोजना गरिएको छ । आईसीए एपी अन्तर्गतको युवा समितिले उक्त कार्यशाला आयोजना गरेको हो । कार्यशालामा युवाहरुलाई सहकारीप्रकृतिको स्टार्ट अप व्यवसाय सुरु गर्न प्रेरित गर्ने उद्देश्यसहित छलफल भएको छ । कार्यशालाले त्यसका लागि २ वर्षे कार्य योजना तयार पार्ने लक्ष्य लिएको छ । 

हिजो नै आईसीए एपीको सञ्चालक समितिको पूर्ण बैठक पनि बसेको छ । बैठकमा आईसीएका अध्यक्ष एरियल ग्वार्को पनि सहभागी हुनुभएको छ । ग्वार्को आईसीए एपीको १६औं साधारण सभामा सहभागी हुन ब्रसेल्सबाट मनिला पुग्नुभएको हो । आइसीए एपीको सञ्चालक समितिमा नेपाली सहकारी अभियानको शीर्ष निकाय राष्ट्रिय सहकारी महासंघ नेपालका अध्यक्ष मिनराज कडेल पनि सदस्य हुनुहुन्छ । उक्त बैठकमा उहाँले नेपाली सहकारी अभियानको प्रतिनिधित्व गर्नुभएको छ । प्रत्येक दुई वर्षमा आयोजना हुने साधारण सभा आईसीए एपीको सर्वोच्च निकाय हो । 

साधारण सभाले आईसीएको क्षेत्रीय निकायको विगत दुई वर्षका कार्यक्रमहरुको समिक्षा गर्नुका साथै भावी नीति तथा कार्यक्रमसहित कार्यदिशा तय गर्ने छ । सभामा सहकारी क्षेत्र र त्यसमा पनि एशिया प्रशान्त क्षेत्रकाका समसामयिक विषयहरुमा पनि छलफल हुने बताइएको छ । सन् २००३ यता पहिलो पटक फिलिपिन्सको सहकारी अभियानले आईसीए एपीको साधारण सभा आयोजना गर्न लागेको हो । 

सभाको सेरोफेरोमा भोलि नोभेम्बर ८ मा ‘कोअपरेटिभ्स आवर कमन एजेन्डा’ थिममा सहकारी ११औं एशिया प्यासिफिक कोअपरेटिभ फोरम पनि आयोजना हुँदैछ । भोलि नै आईसीए एपीले पहिलो पटक सुरुवात गरेको आईसीए एपी कोअपरेटिभ एक्सिलेन्स अर्वाड पनि घोषणा गरिदैछ । सहकारी क्षेत्रमा उत्कृष्ट कार्य गर्ने व्यक्ति, संस्था र नियामक निकाय गरी ३ विधामा यो पुरस्कार दिइने आईसीए एपीले जनाएको छ ।

विश्व सहकारी अभियानको सर्वोच्च निकाय आईसीए अन्तर्गत हाल आईसीए एपी, आईसीए अफ्रिका, आईसीए युरोप र आईसीए अमेरिकाज् गरी ४ वटा क्षेत्रीय कार्यालय रहेका छन् । सन् १९६० मा स्थापना भएको आईसीए एपीको मुख्यालय भारतको राजधानी नयाँ दिल्लीमा अवस्थित छ भने पहिलो क्षेत्रीय साधारण सभा सन् १९९५ मा नयाँ दिल्लीमानै आयोजना गरिएको थियो । आईसीए एपी अन्तर्गत हाल २८ राष्ट्रका करिब १ सय ८ सहकारी सदस्य रहेका छन् । आइसीए एपीको अध्यक्षमा भारतका प्रसिद्ध सहकारीकर्मी डा.चन्द्रपाल सिंह निर्वाचित भएपछिको पहिलो पटक साधारण सभा आयोजना हुन लागेको हो ।