कावासोती । नवलपरासी (ब.सु.पूर्व) कावासोती नगरपालिकामा रहेको पौरखी बचत तथा ऋण सहकारी संस्थाको १३औं वार्षिक साधारणसभा आइतबार सम्पन्न भएको छ । साकोसका अध्यक्ष सालिकराम कोइरालाको अध्यक्षतामा आयोजित साधारणसभाको उद्घाटन प्रमुख अतिथि नेफ्स्कूनका अध्यक्ष परितोष पौड्यालले गर्नुभएको थियो । साकोसको १३औं वार्षिक साधारणसभा अर्थात पाँचौ अधिवेशन मार्फत नयाँ नेतृत्व  चयनको प्रक्रिया समेत अगाडि बढेको साकोसका व्यवस्थापक निलकण्ठ पराजुलीले जानकारी गराउनुभएको छ ।

सभामा जिल्ला समन्वय समितिका प्रमुख बाबुराम विश्वकर्मा, जिल्ला सहकारी संघ काठमाडौंका बरिष्ठ उपाध्यक्ष खेम सुवेदी, जिल्ला बचत संघका अध्यक्ष होमनाथ जैशी र जिल्ला सहकारी संघका प्रतिनिधिहरुको विशेष आतिथ्यता लगायत स्थानीय सहकारीकर्मी र साकोसका सदस्यहरुको उपस्थिति रहेको थियो ।

साधारणसभामा शुभकामना मन्तव्य व्यक्त गर्दै नेफ्स्कूनका अध्यक्ष पौड्यालले बचत तथा ऋण सहकारी संस्थाले आफ्ना सदस्यका सम्पूर्ण वित्तीय आवश्यकता पुरा गर्न अहम भूमिका खेल्नुपर्ने बताउनुभयो । उहाँले साकोस सुदृढीकरणका लागि स्तरीकरण कार्यक्रममा सम्पूर्ण साकोसको पहुँच पुर्याउनुपर्ने आवश्यकता औल्याउनुभयो । अब हरेक साकोसले एउटा स्तरीकरण कार्यक्रम दृढताका साथ उभिएर एकसुत्रमा बाधिनुपर्छ, उहाँले भन्नुभयो, ‘सहकारीको विश्वव्यापी सिद्धान्त अवलम्बन गर्दै विश्व अभ्यासलाई आन्तरिकीकरण गर्नु जरुरी छ, त्यसका लागि राज्य र अभियान एकसाथ अगाडि बढ्नुको विकल्प छैन । नीति, विधि र एकीकृत प्रविधि विकासको माध्यमबाट अभियानको एकीकृत सञ्जालीकरण अवको आवश्यकता हो, उहाँले भन्नुभयो । 

२०६७ साल कार्तिक ७ गते दर्ता कायम भएको पौरखी साकोस कावासोती नगरपालिका, देवचुली नगरपालिकाको वडा नं. १ देखि १५ सम्म र हुप्सेकोट गाउँपालिकाको वडा नं. ४ मा कार्यक्षेत्र विस्तार गरी सदस्यहरुमाझ वित्तीय सेवाको पहुँच पुर्याउँदै आएको छ । 

साकोसको कुल सदस्य ४ हजार ५४ जना पुगेको छ, जसमध्ये महिला सदस्य १ हजार ९ सय १६ जना र पुरुष सदस्य २ हजार १ सय २७ जना र अन्य ११ जना रहेका छन् । साकोसमा ११ जना कर्मचारी कार्यरत छन् ।

साकोसको कुल चुक्ता शेयर पुँजी रु. ३ करोड १८ लाख ७३ हजार ७ सय, कुल बचत रु. २२ करोड ५७ लाख ५५ हजार ७ सय ९९, कुल ऋण लगानी रु. २० करोड २९ लाख ९१ हजार ४ सय ७९ र कुल सम्पत्ती तथा दायित्व ३० करोड ८१ लाख ५७ हजार ४ सय ५० रहेको साकोसका व्यवस्थापक निलकण्ठ पराजुलीले जानकारी गराउनुभयो । 

साकोसले मुख्य गरि कृषि कर्जा, व्यवसायिक कर्जा र आवास कर्जा सुविधा उपलब्ध गराउँदै आएको छ ।