दोलखा । नेपाल राष्ट्र बैंक र सहकारी विभागको निर्देशन अनुसार सहकारी संस्थाहरूलाई सम्पत्ति शुद्धीकरण विरुद्धको एन्टी मनी लाउन्डरी सिस्टम (गोएएमएल) सफ्टवयेरमा आबद्ध गर्ने उद्देश्यसहित दोलखाका सहकारीहरुका लागि तालिम सञ्चालन गरिएको छ । 

दोलखा जिल्ला बचत संघ र नेफ्स्कूनको साझेदारीमा भाद्र १९ गते सञ्चालित तालिममा जिल्लाका विभिन्न सहकारी संघ संस्थाबाट २९ जनाको सहभागिता रहेको थियो । तालिम उद्घाटन सत्रको अध्यक्षता जिल्ला बचत संघका उपाध्यक्ष जगत सुबेदीको अध्यक्षता र राष्ट्र बैंकका निवर्तमान निर्देशक तथा तालिमका सहजकर्ता श्याम कृष्ण दाहालको आतिथ्यतामा भएको थियो । 

१० करोड भन्दा माथिको कारोबार गर्ने सहकारी सस्थाहरुले गोएएमएल प्रणालीमार्फत प्रतिवेदन पेश गर्नुपर्ने व्यवस्था अनुरुप दोलखाका संस्थाहरुलाई लक्षित गरी सो विषयको तालिम आयोजना गरिएको हो । नेपाल राष्ट्र बैङ्कले १० करोड रुपियाँभन्दा बढी निक्षेप वा पुँजी भएका बचत तथा ऋणको कारोबार गर्ने सहकारी संस्थाहरूले गोएएमएल सफ्टवयेरमार्फत राष्ट्र बैङ्कलाई प्रतिवेदन गर्नुपर्ने व्यवस्था छ ।

कार्यक्रमका सभाध्यक्ष सुवेदीले तालिम अत्यन्त प्राविधिक र महत्वपूर्ण रहेको हुँदा तालिमप्रति विशेष ध्यान दिएर आफूलाई अस्पष्ट लागेको विषयहरुमा छलफल गर्न र सिकेको ज्ञान सीपलाई संस्थामा कार्यान्वयनमा ल्याउनुपर्नेमा जोड दिनुभएको थियो । प्रशिक्षक दाहालले तालिम विशुद्ध व्यवहारिक अभ्यास केन्द्रित हुने हुँदा सहभागीहरुलाई तालिम पश्चात कार्यान्वयनमा सहजता हुने स्पष्ट पार्नुभयो । 

तालिमका सहभागी प्रतिनिधिहरुले तालिमबाट प्राप्त ज्ञान सीप कार्यान्वयनमा ल्याउने प्रतिबद्धता व्यक्त गर्नुभएको थियो । 

कार्यक्रमको सञ्चालन नेफ्स्कून दोलखा सदस्य सेवा कार्यालयका प्रमुख दिनेश गौतमले गर्नु भएको थियो भने कार्यक्रमको व्यवस्थापन दोलखा जिल्ला बचत संघका व्यवस्थापक राजकुमार शिवभक्तिले गर्नु भएको थियो । 

सम्पत्ति शुद्धीकरण निवारणसम्बन्धी सहकारी संस्थालाई जारी गरिएको निर्देशिका, २०७४ दफा १९ र २० बमोजिम सबै सहकारी संस्थाको सीमा कारोबार प्रतिवेदन (टीटीआर) शङ्कास्पद कारोबार प्रतिवेदन (एसटीआर) तोकिएको ढाँचामा राष्ट्र बैङ्कको वित्तीय जानकारी एकाइमा पठाउनुपर्ने व्यवस्था छ ।