धनगढी । सहकारीमा देखिएका समस्याहरुको व्यवस्थापन र नेतृत्वको पुनर्जागरण सम्बन्धी तालिम कैलालीको धनगढीमा आईतबार सम्पन्न भएको छ । प्रदेश बचत संघले आबद्ध सदस्य संघ संस्थाहरुको आशन्न निर्वाचनसहितको साधारणसभालाई लक्षित गरि सहकारीमा देखिएका समस्याहरुको व्यवस्थापन र नेतृत्वको पुनर्जागरण सम्बन्धी तालिम सञ्चालन गरेको हो । 

सुदूरपश्चिम प्रदेश बचत तथा ऋण सहकारी संघ लि. को आयोजनामा सम्पन्न तालिमको उद्घाटन प्रमुख अतिथि सुदूरपश्चिम प्रदेश सरकारका भूमि व्यवस्था, कृषि तथा सहकारी मन्त्री रामेश्वर चौधरीले गर्नुभएको थियो । 

कार्यक्रममा प्रदेशका विभिन्न सहकारी संघ संस्था, मन्त्रालय र स्थानीय सहकारीकर्मीहरु गरी २०० जनाको उपस्थिति रहेको थियो । प्रदेश बचत संघका अध्यक्ष माधव जोशीको अध्यक्षतामा आयोजित कार्यक्रममा नेफ्स्कूनका पूर्व अध्यक्ष ऋषिराज घिमिरेको विशिष्ट आतिथ्यता सहित नेफ्स्कूनका महासचिव दामोदर अधिकारी, राष्ट्रिय सहकारी बैंककी सञ्चालक शिवा थापा, नेपाल केन्द्रीय कृषि सहकारी संघका सञ्चालक धर्मसिंह कूँवर र आन्तरिक राजश्व कार्यालयका प्रमुख कर अधिकृत गौरी उपाध्यायको आतिथ्यता रहेको थियो ।

कार्यक्रम उद्घाटन सत्रमा प्रमुख अतिथि र अथितिहरुबाट शुभकामना मन्तव्य राख्नुभएको थियो ।