भक्तपुर । भक्तपुरको नगरकोटमा सञ्चालित नेफ्स्कूनका ऋण प्रशासकहरुको क्षमता विकास तालिम शनिवार सम्पन्न भएको छ । संघका अध्यक्ष परितोष पौड्यालले तालिमको समापन गर्नुभएको थियो । समापन समारोहलाई सम्बोधन गर्दै अध्यक्ष पौड्यालले तालिमबाट कर्मचारीहरुले टर्च लाईट पाएको र यसबाट अभियानलाई उज्यालोतर्फ डोर्याउन मार्गप्रशस्त भएको बताउनुभयो । अभियानको शुद्धीकरण र सुदृढीकरणमा कर्मचारीको ठूलो हात हुने विचार प्रस्तुत गर्दै उहाँले सहकारीका हरेक सदस्यलाई अभियानको स्वामित्व ग्रहण गर्ने वातावरण निर्माणमा भूमिका खेल्न आव्हान गर्नुभयो । अध्यक्ष पौड्यालले भन्नुभयो, “बचत तथा ऋण सहकारी अभियानको वर्तमान बदलेर सुन्दर भविष्य निर्माण गर्नका लागि कर्मचारी एक सशक्त सिल्पीकार हुन्, उनीहरुमा आफू पारस पथ्थर बनेर टल्कने र अरुलाई पनि टल्काउने सीप निहित हुनुपर्छ ।”

भाद्र ६ देखि ९ गतेसम्म सञ्चालित तालिममा संघको केन्द्रीय कार्यालय, विभिन्न सदस्य सेवा कार्यालय र सेवा केन्द्रमा कार्यरत सहायक स्तरका ऋण प्रशासकहरु गरी ४० जनाको सहभागिता रहेको थियो ।

तालिमको सहजीकरण संघका प्रमुख कार्यकारी अधिकृत शिवजी सापकोटा, सहकारी विभागका उपरजिष्ट्रार टोलराज उपाध्याय, संघका कानुनी परामर्शकर्ता अधिवक्ता शिव कुमार अधिकारी, धितो मूल्यांकनकर्ता इञ्जिनियर निराजन पुडासैनी र संघका सहायक कार्यकारी अधिकृत एवं विभागीय प्रमुखहरुले गर्नुभएको थियो । तालिम समापन समारोहको सञ्चालन संघका सहायक कार्यकारी अधिकृत एवं विभागीय प्रमुख सञ्जयराज तिमिल्सीनाले गर्नुभएको थियो ।