कास्की । पोखरा–२७, तालचोकमा रहेको लेखनाथ सामुदायिक बचत तथा ऋण सहकारी संस्था लि.प्रोबेसन कार्यक्रममा आबद्ध भएको छ । पूर्ण तथा व्यावसायिक साकोस विकास कार्यक्रम (प्रोबेसन) नेफ्स्कूनद्वारा सञ्चालित गुणस्तर सुनिश्चितताको राष्ट्रिय स्तरको कार्यक्रम हो । 

साकोसको सभाहलमा आज आयोजित संक्षिप्त कार्यक्रमका बीच नेफ्स्कूनका कार्यक्रम अधिकृत मनोज खड्का र साकोसका प्रमुख कार्यकारी अधिकृत शंकर प्रसाद पौडेलले कार्यक्रम सम्झौतामा हस्ताक्षर गर्नुभएको थियो ।  सो अवसरमा साकोसका अध्यक्ष  मेजर रामप्रसाद गुरुङ, सञ्चालक लक्ष्मी बास्तोला, उणउपसमिति सदस्य देववहादुर सुनार, उपप्रवन्धक विष्णु प्रसाद चापागाईं, सहायक प्रवन्धक सारदा रेग्मी पोख्रेल र नेफ्स्कून पोखरा सदस्य सेवा कार्यालयका प्रमुख सुर्य प्रसाद तिमल्सिनाको उपस्थिति थियो । 

समुदाय केन्द्रित लेखनाथ सामुदायिक साकोसमा हाल १ हजार ५६ जना शेयर सदस्य छन् भने कुल वासलात ३१ करोड १६ लाख ६२ हजार रहेको छ । सदस्यहरुको विश्वास जिल्न सफल लेखनाथ सामुदायिकले आफुलाई सुशासनमा अब्बल बनाउने उद्देश्यसहित नेफ्स्कूनद्वारा सञ्चालित राष्ट्रिय स्तरको गुणस्तर सुनिश्चितताको कार्यक्रम प्रोबेसनमा अभ्यासरत रहने प्रतिबद्धता समेत व्यक्त गरेको छ । 

सहकारीको सिद्धान्त पालना नगर्ने साथै सुशासनमा नचलेका केही सहकारी संस्थाहरुमा पछिल्ला दिनहरुमा समस्या उब्जिएसँगै समुदायमा सञ्चालित बचत तथा ऋण सहकारी संस्थाका सञ्चालक समिति, व्यवस्थापन पक्ष र सदस्यहरु सचेत बन्दै गईरहेका छन् ।