दोलखा । सदस्यसँग नेफ्स्कून कार्यक्रम अन्तर्गत आज दोलखाका सहकारीकर्मीहरुसँग सदस्य स्वजागरण अभियान सञ्चालन भएको छ । 

कार्यक्रममा दोलखाका विभिन्न बचत तथा ऋण सहकारी सस्थाहरुबाट २० जनाको उपस्थिति थियो ।

कार्यक्रम नेफ्स्कूनका सञ्चालक सदस्य तथा सदस्य सेवा कार्यालय दोलखाका संयोजक जिबस राज खडकाको अध्यक्षता र नेफ्स्कूनका महासचिव दामोदर अधिकारीको प्रमुख आतिथ्यतामा सञ्चालन भएको थियो । 

महासचिव अधिकारीले दोलखाको सहकारी अभियान सक्षम, दिगो रहेको र हालको आर्थिक संकूचनको प्रभाव विश्व प्रभाव रहेकोले यसबाट हामी सबैनै अछुतो रहन नसक्ने हुँदा साकोसहरुले पनि सदस्य स्वोजागरण अभियान सञ्चालन गर्नुपर्नेमा जोड दिनुभयो । उहाँले साकोसले ऋण असुलीका सम्बन्धमा सदस्य सँग नजिक भएर सदस्य र सदस्यको परिवारमा सौहाद्र्धपूर्ण व्यवहार गरेर समाधान गर्नुपर्ने बिषय प्रस्तुत गर्नु भयो । 

सहकारीको आयकर बृद्धिको विषय, कर्जा सूचना केन्द्र, कर्जा असुली न्यायाधिकरण स्थापनामा नेफ्स्कूनले आफ्नो पहल जारी राखेको र यसलाई छिट्टै निश्कर्षमा पुर्याउन निरन्तर वहश पैरवी गरिरहेको बताउनुभयो । 

सदस्य सस्थाका प्रतिनिधिहरुले दोलखाको सहकारी अभियानका समस्या र चुनौतिका विषयमा अभिभावक संघ नेफ्स्कूनले विशेष ध्यान दिनुपर्ने धारणा राख्नुभएको थियो । सदस्यहरुले सहकारीको कर्जा सूचना केन्द्र, कर्जा असुली न्यायाधिकरणको तत्काल स्थापना गर्न नेफ्स्कूनको पहलका लागि आवाज उठाउनुभएको थियो । हालै मात्र नेपाल सरकारले निति तथा कार्यक्रममा बचत तथा ऋण सहकारीमा आयकरको दर वृद्धि गर्नु साकोस अभियान माथिको गम्भीर प्रहार भएको बिषयलाई नेफ्स्कूनले ध्यान दिनुपर्ने र उक्त निर्णय फिर्ता गर्न पहल गरि निचोडमा पुर्याउनुपर्ने धारणा राख्नुभएको थियो । 

कार्यक्रमको व्यवस्थापन तथा सञ्चालन नेफ्स्कून सदस्य सेवा कार्यालय दोलखाका प्रमुख दिनेश गौतमले गर्नु भएको थियो ।