सर्लाही । लालबन्दी नगरपालिका १, नवलपुरमा सञ्चालित ग्रामिण बचत तथा ऋण सहकारी संस्था लि. ले सदस्यहरुका लागि निःशुल्क स्वास्थ्य शिविर सञ्चालन गरेको छ । जानकी मेडिकल कलेज तथा शिक्षण अस्पताल रामदैया भवाडी धनुषाको प्राविधिक सहयोग तथा लालबन्दी नगरपालिका वडा नं. १ को समन्वयमा शिविर सञ्चालन गरिएको हो । शिविरबाट साकोसका सदस्य तथा अन्य गैर सदस्य गरी ४ सय २६ जनाले स्वास्थ्य सेवा लिनुभएको थियो । 

शिविरमा जानकी मेडिकल कलेजका प्रा.डा.जे.एन. शाह र  प्रो.डा. धर्म दत्त सुवेदी  को नेतुत्वमा स्त्री तथा प्रसूति रोग सम्बन्धी परामर्श, आँखाको दृष्टि परिक्षण, स्वास्थ्य परिक्षण तथा परामर्श, दन्त रोग परिक्षण, छाला रोग परिक्षण, हाड जोर्नी, नाक कान घाँटी जाँच तथा अन्य परामर्श सेवाहरु उपलब्ध गराइएको थियो । निःशुल्क स्वास्थ्य शिविरमा स्वास्थ्य सेवासँगै निःशुल्क भिडियो एक्सरे, रगत परिक्षण लगायतका अन्य जाँच सुविधा पनि उपलब्ध गारइएको थियो । 
  
विभिन्न स्वास्थ्य समस्याबाट ग्रस्त सदस्यहरुले सहकारीले निःशुल्क स्वास्थ्य परिक्षण सेवा उपलब्ध गराएकोमा खुसी हुँदै ठूलो राहत महशुस गरेका छन् ।