काठमाडौं । प्यूठानमा सञ्चालित जनकल्याण बचत तथा ऋण सहकारी संस्था लि. र पुरन ठाँटी बचत तथा ऋण सहकारी संस्था लि. जोखिममा आधारित साकोस सुपरिवेक्षण कार्यक्रम कर्ब्समा आवद्ध भएका छन् । 

प्यूठान झिमरुक गाउँपालिका ५, मच्छीमा रहेको जनकल्याण साकोस र ऐरावती गाउँपालिका बरौलामा रहेको पुरन ठाँटी साकोस एकैदिन कर्ब्स कार्यक्रममा आवद्ध भएका हुन् । 

वैशाख ९ गते जनकल्याण साकोसको कार्यालयमा आयोजित एक संक्षिप्त कार्यक्रमका बीच साकोसका अध्यक्ष खड्का बहादुर के.सी., सहसचिव लिलाधर न्यौपाने, व्यवस्थापक कृण्ण बहादुर जि.सी. र नेफ्स्कूनको तर्फबाट कार्यक्रम अधिकृत कोमलराज अधिकारी र दाङ फिल्ड कार्यालय इन्चार्ज विष्णु जोसीले सम्झौतापत्रमा हस्ताक्षर गर्नुभएको थियो । १ हजार १ सय सदस्य रहेको जनकल्याण साकोसको कुल वासलात ७ करोड ५० लाख रहेको छ । 

त्यसैगरी सोही दिन प्यूठानको ऐरावती गाउँपालिका करौलामा रहेको पुरन ठाँटी साकोस पनि जोखिममा आधारित साकोस सुपरिवेक्षण कार्यक्रम कर्ब्समा आबद्ध भएको हो । साकोसको कार्यालयमा आयोजित कार्यक्रममा उपस्थित साकोसका अध्यक्ष प्रेम प्रसाद आचार्य, सचिव कमला ज्ञवाली, व्यवस्थापक गोविन्द बहादुर जि.सी.र नेफ्स्कूनको तर्फबाट कार्यक्रम अधिकृत  कोमलराज अधिकारी र फिल्ड कार्यालय इन्चार्ज विष्णु जोशीले कर्ब्स सम्झौतापत्रमा हस्ताक्षर गर्नुभएको थियो । एक हजार एक सय सदस्य रहेको पुरन ठाँटी साकोसको ६ करोड ५० लाख वासलात रहेको छ ।  

सहकारी क्षेत्रमा देखिएको तरलता समस्या साथै अस्वस्थ वित्तीय संरचनाका कारण सञ्चालन जोखिम बढ्दै गएपछि धेरै सहकारीहरु संस्थागत सुधार तथा वित्तीय सूचकांकको सबलताप्रति सचेत देखिएका छन् । संस्थामा सञ्चालन जोखिमका बाबजुत पनि गुणस्तर सुधारको पक्षमा साकोसहरुको जोडबल रहेको छ भने सदस्य केन्द्रीत सेवा प्रवाहलाई प्राथमिकता दिएका छन् । 

कर्ब्स कार्यक्रम नेफ्स्कूनले सञ्चालन गरेको जोखिममा आधारित साकोस सुपरिवेक्षण कार्यक्रम हो, जुन नेफ्स्कून जिल्ला संघ साझेदारी कार्यक्रम अन्तर्गत पनि सञ्चालित छ ।