भक्तपुर । भक्तपुर जिल्ला बचत तथा ऋण सहकारी संघ लि.को मध्यपुर थिमि र सूर्यविनायक नगर सहकारी समन्वय उपसमितिको संयुक्त आयोजनामा सहकारीमा देखापरेका समस्या र समाधान विषयक अन्तरक्रिया शनिबार सम्पन्न भएको छ । 

कार्यक्रमका प्रमुख अतिथि मध्यपुर थिमि नगरपालिकाका उपप्रमुख विजय कृष्ण श्रेष्ठले समुदायका सहकारीहरु स्थानीय व्यक्तिहरु मिलेर चलाएको संस्थाहरुमा समस्या नभएको बताउदै बेमानी गर्ने नियतले खोलेका सहकारी जहाँ सुनका सिक्का, उपाहार लगायतका प्रलोभन दिई बचत संकलन गर्ने, बचत तथा ऋण लगानीको सामान्य अभिलेखीकरण समेत नराख्ने सहकारीमा समस्या आएको बताउनुभयो । उहाँले सहकारीका समस्याहरुप्रति सहकारीकर्मीहरु विचलित नहुन अनुरोध गर्दै सहकारी सुरक्षित रहेको तर सचेत हुनुपर्ने विचार व्यक्त गर्नुभयो । 

सहकारी संस्थाले न्यून आय भएका सदस्यहरुलाई स्वरोजगार बनाउन महत्वपुर्ण भूमिका खेलेको बताउदै सदस्यले आफ्नो संस्थालाई माया गर्नुपर्ने विचार व्यक्त गर्नुभयो । 

संघका उपाध्यक्ष हरि बल्लले अन्तरक्रिया कार्यक्रममा उठेका जिज्ञासाको जवाफ दिर्दै एक व्यक्ति एक सहकारी व्यबहारमा लागु गर्न कठिन रहेको बताउनुभयो साथै सहकारीहरुको अनुगमन नगरपालिकाले बनाएको सहकारी ऐन अनुसार विषयगत संघको समेत सहभागितामा गर्नुपर्ने आवश्यकता औल्याउनु भयो ।

संघका कोषाध्यक्ष कान्छा भक्त घजुले सम्पूर्ण सहकारीहरु वित्तीय अनुशासनको परिपालना गर्नुपर्ने विचार राख्नुभयो । वहाँले सहकारी संस्था कोपोमिसमा आबद्ध हुनुपर्ने र सम्पत्ती शुद्धीकरणका व्यवस्थाहरु पालना गर्नुपर्नेे बताउनुभयो । सहकारी संस्थाले तरलतालाई वेवास्ता गरी बढी भन्दा बढी बाह्य ऋण लिएर ऋणमा लगानी गर्ने, जगेडा कोषको भन्दा बढी घरजग्गा जोडने संस्थामा तरलता समस्या देखिएको बताउनु भयो ।

मध्यपुर थिमि नगरपालिकाका सहकारी शाखा प्रमुख सुरेश राईले सहकारी सिद्धान्त, मूल्य र मान्यतमा सञ्चालन संस्थाहरु मजबुत भएको बिचार राख्दै सहकारी संस्थाहरु एक आपसमा  प्रतिस्पर्धी हुन नहुने बताउनुभयो । सुर्यविनायक नगरपालिकाका सहकारी शाखा प्रमुख राजेन्द्र कुमार श्रेष्ठले सहकारीको भित्री र बाहिरी समस्याहरुको पहिचान गरि समाधान गर्नुपर्ने र प्रविधि अनुसार सँगसँगै अगाडी बढ्नुपर्ने विचार राख्नुभयो । वहाँले आफ्नो संस्थाको प्रतिवेदनबारे सदस्यहरुले ध्यान सचेत हुनुपर्ने बताए । वहाँले नियमक निकायको निरिक्षण पश्चात दिइएका सुझावहरुको परिपालना गर्नूपर्नेमा जोड दिनुभयो ।

संघका व्यवस्थापक बालकृष्ण धोंजुले सहकारीमा देखा परेका समस्या र समाधान विषयमा कार्यपत्र प्रस्तुत गर्नुभएको थियो । संघमा आबद्ध संस्थाहरु मध्ये ८१ जनाको सहभागिता रहेको सो कार्यक्रमको सञ्चालन सूर्यविनायक नगर सहकारी समन्वय उपसमितिका सदस्य मिठाराम न्यौपानेले गर्नुभएको थियो ।