काभ्रे । एसियाली ऋण महासंघकी प्रमुख कार्यकारी अधिकृत Elenita V. San Roque र प्रमुख प्राविधिक अधिकृत Ranjith Hettiarachchi ले चण्डेश्वरी साकोसको अवलोकन भ्रमण गर्नुभएको छ । पौष २३ गने बनेपा–८ काभ्रेमा रहेको संस्थाको कार्यालयमा उपस्थित भई उहाँहरुले संस्थाका वित्तीय तथा सामाजिक गतिविधिहरु अध्ययन अवलोकन गर्नुभएको हो । 

चण्डेश्वरी साकोस नेफ्स्कूनद्वारा प्रवर्द्धित एशियाली स्तरको साकोस गुणस्तर सुनिश्चितताको कार्यक्रम अन्तर्गत यस बर्षको एक मात्र ब्राण्ड प्राप्त संस्था हो । 

संस्थाको कार्यालयमा पुग्नुभएका अक्कूका सिइओ लेनी र प्रमुख प्राविधिज्ञ रञ्जित हिताराचीलाई संस्थाका अध्यक्ष नविन भक्त बादे लगायत सञ्चालक समितिका पदाधिकारी, सदस्यहरु र व्यवस्थापनका कर्मचारीहरुले स्वागत गर्नु भएको थियो । 

साकोसका अध्यक्ष श्रेष्ठको अध्यक्षतामा आयाजित कार्यक्रमको सञ्चालन सचिव बुद्धरत्न मानन्धरले गर्नुभएको थियो भने प्रमुख कार्यकारी अधिकृत झलेन्द्र दाहालले स्वागत मन्तव्य व्यक्त गर्नु भएको थियो । प्र.का.अ.दाहालले साकोसले विगतमा कोभिड १९ को कारणले उत्पन्न चुनौतिका बारेमा र आगामी दिनमा आउन सक्ने चुनौतिको बारेमा बताउनु भएको थियो । साथै प्रमुख कार्यकारी अधिकृतबाट संस्थाको विगत, बर्तमान, संस्थाका वित्तीय सेवाहरु, सदस्य लाभ कार्यक्रम लगायतको प्रस्तुतिकरण पनि गर्नु भएको थियो । कार्यक्रममा नेपाल बचत तथा ऋण केन्द्रीय सहकारी संघ (नेफ्स्कून) का तर्फबाट सदस्य सेवा विभाग प्रमुख गणेश प्रसाद तिमल्सीना र बरिष्ठ अधिकृत पे्रमनाथ वाग्ले उपस्थित हुनुहुन्थ्यो ।  

 
कार्यक्रमका अवसरमा अक्कूकी सिईओ लेनीले साकोसका अध्यक्ष श्रेष्ठलाई पुनः एक्सेस ब्राण्डको प्लेग हस्तान्तरण गर्नुभएको थियो । ब्राण्डको महत्व तथा औचित्यता बारे प्रष्ट्याउँदै सिइओ लेनीले एक्सेस ब्राण्डले सहकारीको सन्तुलित वित्तीय अवस्थाको सुनिश्चितता गर्ने बताउनुभयो । उहाँले ब्राण्ड प्राप्त संस्थामा सदस्यहरुले आफ्नो बचत रकम सुरक्षित भएकोमा विश्वस्त रहने सक्ने आधार हुने स्पष्ट पार्नुभयो । ब्राण्ड केवल देखाउनका लागि मात्र नभएर संस्थाको सेवा र कार्यक्रमबाट सदस्यले आत्मबोध गर्ने खालको हुनुपर्ने उहाँको भनाइ थियो । चण्डेश्वरी साकोस सन् २०२२÷२३ मा नेपालको एकमात्र एक्सेस ब्रोन्ज ब्राण्ड प्राप्त गर्न सफल भएकोमा संस्थालाई बधाई तथा शुभकामना व्यक्त गर्नुभएको थियो ।     

कार्यक्रम समापनका अवसरमा बोल्दै अध्यक्ष श्रेष्ठले अक्कूको प्रमुख व्यक्तित्वबाट भएको साकोस भ्रमणका लागि धन्यबाद व्यक्त गर्दै प्राप्त सल्लाह सुझावहरु साकोसमा अंगिकार हुने बचतबद्धता व्यक्त गर्नुभएको थियो । 

हाल चण्डेश्वरी साकोसमा ८ हजार ५०० भन्दा बढि सदस्यहरु आबद्ध छन भने संस्थाको कुल सम्पत्ति १ अर्ब १७ करोड ६८ लाख ६९ हजार ४२० रहेको छ । संस्थाको संस्थागत पुँजी ११ करोड ६४ लाख ४ हजार रहेको छ भने तरलता २२.८० प्रतिशत कायम रहेको छ ।