काठमाडौं । नेफ्स्कून कलंकी फिल्ड कार्यालयको आयोजनामा आज काठमाडौंका केही बचत तथा ऋण सहकारी संस्थाहरुसँग सहकारीका समसामयिक विषयहरुमा अन्तरक्रिया भएको छ । 

काठमाडौंको कुलेश्वर, कालीमाटी, टेकु र कलंकी क्षेत्रमा सञ्चालित संघमा आबद्ध भएका र आबद्ध हुन बाँकी बचत तथा ऋण सहकारी संस्थाहरु बीच अन्तरक्रिया गरिएको हो । कार्यक्रममा विभिन्न बचत तथा ऋण सहकारी संस्थाबाट गरी ४० जनाको सहभागिता रहेको थियो । 

नेफ्स्कूनका कोषाध्यक्ष दिपक पनेरुको अध्यक्षतामा आयोजित कार्यक्रमको सहजीकरण संघका सहायक कार्यकारी अधिकृत एवम् सदस्य सेवा विभाग प्रमुख गणेश तिमल्सिनाले गर्नुभएको थियो । 

कोषाध्यक्ष पनेरुले सहकारीका विद्यमान समसामयिक समस्याको जड नै सुशासनमा कमजोरी रहेको बताउनुभयो । उहाँले साकोसको सुरक्षा, सबलीकरण र सुदृढीकरणका लागि अव अभियानमा ऐक्यबद्धताको विकल्प नभएको बताउँदै सम्पूर्ण बचत तथा ऋण सहकारी संस्थाहरु संघमा आवद्ध भई गुणस्तर सुधारका कार्यक्रममा सहभागी हुन अनुरोध गर्नुभयो । नीति, विधि र प्रविधिगत एकरुपता विना साकोस अभियान सुरक्षित हुन नसक्नेमा उहाँले जोड दिनुभएको थियो ।