काठमाडौं । आज डिसेम्बर १० । लैगिक हिंसा विरुद्धको १६ दिने अभियानको अन्तिम दिनका अवसरमा रुपन्देहीस्थित जनउत्थान बचत तथा ऋण सहकारी संस्था लि.साकोसका सञ्चालक समिति, लेखा समिति र उपसमितिमा रहेका महिलाहरुका लागि लैंगिक हिंसा न्यूनिकरण र नेतृत्व विकास तालिम सञ्चालन गरेको छ । 

कार्यक्रम साकोसकी अध्यक्ष ज्ञानु पौडयालको अध्यक्ष्यता र तुलसीपुर उच्च अदालत बुटवल इजलासका माननिय न्यायाधीश सरला कुमारी पाण्डेको प्रमुख आतिथ्यतामा भएको थियो । कार्यक्रम सहजीकरण महिला बालबालिका तथा जेष्ठ नागरिक मन्त्रालय महाशाखा प्रमुख सारदा बश्याल र अध्यक्ष ज्ञानु पौड्यालले गर्नु भएको थियो ।

कार्यक्रममा तुलसीपुर उच्च अदालत बुटवल इजलासका माननीय न्यायाधीश सरला कुमारी पाण्डेले पछिल्लो समय श्रीमान श्रीमतिको सम्बन्ध विच्छेद बढिरहेको र यसले समाजमा नराम्रो प्रभाव पारिरहेको बताउनु भयो । उहाँले पछिल्लो समय झनै लैगिक हिंसा र बलात्कारका घटनाहरु बढिरहेको बताउनु भयो । सहकारीको नेतृत्व तहमा रहेका महिलाहरुले हरेक क्षेत्रमा महत्वूर्ण भुमिका खेल्नेहुँदा हिंसा न्यूनिकरण गर्न सहकारीको सञ्जाल लाग्नुपर्ने उहाँले बताउनु भयो । महिला नेतृत्वद्वारा सञ्चालित जनउत्थान बचत तथा ऋण सहकारी संस्था देशकै उत्कृष्ठ र एशियामै सफल सहकारीको रुपमा परिचित हुनुले निकै गर्व महसुस भएको बताउनुभयो । 

तालिममा ३६ जना महिलाहरुको सहभागिता रहेको थियो । 

प्रत्येक बर्ष २५ नोभेम्बर देखि १० डिसेम्बर सम्म लैंगिक हिंसा विरुद्धको दिवसको रुपमा मनाइने १६ दिने अभियानको यस वर्षको राष्ट्रिय नारा सभ्य समाजको पहिचानः लैङ्गिक हिंसा विरुद्धको अभियान रहेको थियो ।