काठमाडौं । पूर्ण तथा व्यवसायिक साकोस विकास कार्यक्रम (प्रोबेसन) अन्तर्गत गण्डकी क्लष्टर तेस्रो, कास्कीको पाँचौ कार्यकुशलता तथा सिकाई व्यवस्थापन कार्यशाला शुक्रबार सम्पन्न भएको छ । 

नेफ्स्कूनको प्राविधिक सहयोगमा सञ्चालित कार्यशालाको अध्यक्षता साकोसकी अध्यक्ष निर्मला वास्तोला र प्रमुख अतिथि पोखरा महानगरपालिका वडा न.९का वडा अध्यक्ष दिपेन्द्र मरासिनीले गर्नुभएको थियो । 

कार्यक्रममा प्रमुख अतिथि मरासिनीले सहकारीहरुले उत्पादनमुलक क्षेत्रमा लगानी गर्नुपर्ने र सामाजिक उत्तरदायित्वपूर्ण कार्य गरेर सदस्यहरुमाझ सहकारीका सदस्य हुनुको अनुभूति गराउनुपर्ने बताउनुभयो । उहाँले सहकारी क्षेत्रका सञ्चालक र कर्मचारीहरु अव भाषणलाई नभएर नजितामुखी काममा जोड दिएर सदस्यको बचतको सुरक्षा गर्न र सदस्यहरुमाझ विश्वासको वातावरण सृजना गर्नुपर्ने आवश्यकता रहेको चर्चा गर्नुभयो । 

कार्यशालामा उक्त समूहमा आवद्ध म्याग्दी, गोरखा र कास्कीका विभिन्न साकोसहरुबाट ५२ जनाको सहभागिता रहेको थियो । कार्यशाला सहजीकरण नेफ्स्कूनका वरिष्ठ अधिकृत भरत प्रसाद न्यौपानेले  गर्नुभएको थियो । कार्यशालामा नेफ्स्कूनका सहायक कार्यकारी अधिकृत एवम् व्यवसाय विभाग प्रमुख दुर्गा प्रसाद ढकालको पनि विशेष उपस्थिति रहेको थियो ।