नेफ्स्कूनको बागमती प्रदेशस्तरीय बिस्तारित मञ्च सम्पन्न 

काठमाडौं । नेफ्स्कूनको आसन्न ३१औं बार्षिक साधारणसभाका अवसरमा मंसिर १६ देखि सुरु भएको प्रदेशस्तरीय बिस्तारित मञ्च अन्तर्गत आज बागमती प्रदेश स्तरीय विस्तारित मञ्च काठमाडौंमा सम्पन्न भएको छ । प्रभावकारी सञ्जाल र जिम्मेवार सदस्यका लागि विस्तारित मञ्च कार्यक्रमको उद्घाटन सहकारी विभागका रजिष्ट्रार रुद्र प्रसाद पण्डितले गर्नुभएको थियो । संघले यसअघि ६ वटै प्रदेशहरुमा विस्तारित मञ्चका कार्यक्रमहरु सम्पन्न गरिसकेको छ । संघको ३१औं बार्षिक साधारणसभा पौष ८ गते काठमाडौंमा हुँदैछ । 

कार्यक्रम उद्घाटन सत्रलाई सम्बोधन गर्दै प्रमुख अतिथि रजिष्ट्रारा पण्डितले सहकारीका सदस्यहरुमा विश्वासको संकट पैदा हुनुले सहकारीमा समस्या देखिएको वताउनुभयो । उहाँले सहकारीमा जस्तो संरक्षित पुँजी फिर्ता कोषको व्यवस्था अन्यत्र कहाँ छ ? त्यो कुरा र त्यसको महत्व साथै सुख दुःखको सारथी रहेको सहकारीप्रति सदस्यको विश्वास कायम गर्न सबै एकजुट भएर लाग्न अनुरोध गर्नुभयो । उहाँले बैकबाट प्राप्त गर्ने लाभ र सहकारीबाट प्राप्त गर्ने लाभमा धेरै फरक रहेको बताउँदै सहकारी संस्थाका सञ्चालक र कर्मचारीहरुले कहाँ के कमजोरी छन्, त्यसलाई सच्याएर पुनरावलोकन गर्ने समय आएको स्पष्ट पार्नुभयो । 

रजिष्ट्रार पण्डितले सहकारी ऐन, २०७४ र सहकारी नियमावली, २०७५ ले व्यवस्था गरेका कानुनी तथा संरचनागत विषयहरुको कार्यान्वयन गर्न सक्यौं भने मात्र सहकारी क्षेत्रलाई चलायमान र गतिशिल बनाउन सकिने भन्दै विभाग त्यसैमा लागि परेको चर्चा गर्नुभयो । उहाँले सहकारी क्षेत्रमा अति आवश्यक कर्जा असुली न्यायाधिकरण गठन अन्तिम चरणमा पुगेको, कर्जा सूचना केन्द्र तालुकदार मन्त्रालयमा पुगेको र बचत तथा कर्जा संरक्षण कोष स्थापनाको विषयमा पनि मन्त्रालयमा बारम्बार छलफल भइरहेको समेत जानकारी गराउनुभयो । रजिष्ट्रार पण्डितले अहिले सहकारी क्षेत्रमा जे जति रोग र रोगका लक्षणहरु देखिएका छन्, ति सबैनै सहकारीको पुँजी अनुत्पादक क्षेत्रमा लगानी भएका कारण देखिएको भन्दै सहकारीको लगानी उत्पादनमूलक क्षेत्रमा परिचालित हुनुपर्नेमा जोड दिनुभयो । 

नेफ्स्कूनका अध्यक्ष परितोष पौड्यालले विश्वव्यापी घटनाक्रमले सहकारी अभियानमा प्रत्यक्ष असर परेको र आगामी दिनहरु थप चुनौतीपूर्ण हुनसक्ने तर्फ संकेत गर्दै सहकारी क्षेत्र सचेत र सजग रहेर अगाडि बढ्न अनुरोध गर्नुभयो । उहाँले केही दिनअघि भारतको उडिसामा उच्च वौद्धिक व्यक्तिहरुसँग भएको छलफलका विषयहरुलाई उधृत गर्दै कोभिडको समस्या र त्यसयता उत्पन्न परिस्थिति हाम्रो लागि निकै चुनौती बनेको धारणा व्यक्त गर्नुभयो । सहकारी अभियानले चुनौतिका बीच सम्भावनाको खोजी गर्ने भएकोले नै नेफ्स्कूनले सातै प्रदेशबाट नीति, कार्यक्रम योजना, महासचिवको प्रतिवेदन, लेखा समितिको प्रतिवेदन आदि विषयमा ‘रुट’ तहसम्म गएर प्रर्याप्त सुझावहरु संकलन गरेको र अभियानमा यसले महत्वपूर्ण भूमिका खेल्नसक्ने बताउनुभयो । साकोस अभियान सुदृढीकरणका दुई विषय स्तरीकरण र स्थिरीकरण कोष हुन्, कोष सञ्चालनका लागि रजिष्ट्रारको महत्वूर्ण साथ सहयोगले मात्रै सम्भव भएको उहाँले बताउनुभयो । 

नेफ्स्कूनका प्रमुख कार्यकारी अधिकृत प्रकाश प्रसाद पोखरेल नेफ्स्कूनको प्रस्तुतीकरण गर्नुभएको थियो । उहाँले प्रस्तावित नीति कार्यक्रममा पृष्ठपोषण संकलन गर्ने तथा संघले गरेका कार्यक्रम तथा बहसपैरवीबारे जानकारी गराउने उद्देश्यले देशव्यापी विस्तारित मञ्च आयोजना गरिएको जानकारी गराउनुभयो । उहाँले विस्तारित मञ्चको कार्यक्रम सदस्यहरुको बैचारिक संयोग रहेको भन्दै विस्तारित मञ्चको नीतिगत व्यवस्थाबारे प्रष्ट पार्नुभयो । सदस्य केन्द्रीयतामा सदस्य उपस्थिति र परामर्शका कार्यक्रमहरु, संस्थाले प्रदान गरेका सेवाहरुप्रति सदस्यलाई जिम्मेवार बनाउनका लागि संस्थापकीय सरोकार, सञ्चालकीय सक्रियता र संरक्षकीय सम्बन्धबारे जानकारी गराउनुभयो । 

नेफ्स्कूनका पूर्व अध्यक्ष एवं सल्लाहकार ऋषिराज घिमिरेले विश्व अभ्यासमा रहेको क्रेडिट यूनियन ऐक्ट हामीलाई चाहियो भन्ने कुरा अब दवायर र विस्तारै हैन बुलन्दका साथ आवाज उठाउन अभियालाई अनुरोध गर्नुभयो । बचत तथा ऋण सहकारी अभियान संरक्षणका लागि क्रेडिट यूनियन ऐक्टको विकल्प नभएको भन्दै साकोसका सदस्यहरुले ऐक्यबद्ध आवाजका साथ संघलाई झक्झक्याउन आग्रह गर्नुभयो । उहाँले सहकारी अभियान राम्रो छ, केवल यसलाई राजनीतिकरणबाट बाहिर राख्न र शुद्धीकरण गर्न आवश्यक रहेको भन्दै त्यसका लागि शुभकामना व्यक्त गर्नुभयो । 

  
विस्तारित मञ्चको खुला सत्रमा सहभागीहरुले राख्नुभएका जिज्ञासाहरुलाई सम्बोधन गर्दै नेफ्स्कूनका महासचिव दामोदर अधिकारीले नेफ्स्कूनको वर्तमान नेतृत्वले हरेक एजेण्डा भन्दा अगाडि वित्तीय सहकारी ऐन नेपालमा लागु गराउने र बचत ऋण सहकारी संस्थाहरुको छुट्टै पहिचान, सञ्चालन विधि र विश्वाव्यापी अभ्यासहरुलाई अंगिकार गरेर नेपालको वित्तीय सहकारी अभियानलाई जोखिम रहित बनाउने अभियानमा नेफ्स्कून निरन्तर अगाडि बढिरहेको र त्यसका लागि सदस्य संघ संस्थाहरुको साथ सहयोगको अपेक्षा रहेको बताउनुभयो ।

राष्ट्रिय सहकारी महासंघका सञ्चालक एव राष्ट्रिय सहकारी बैकका अध्यक्ष के.बी. उप्रेतिले सहकारी अभियानप्रति सदस्यहरुको अपेक्षा धेरै रहेको छ, त्यसका लागि सबै मिलेर सहकारी शुद्धीकरणमा लाग्न आवश्यक रहेको बताउनुभयो । सर्वप्रथम सहकारीका सञ्चालक सुध्रिनुपर्ने, कर्मचारी सुध्रिनुपर्ने, उठ्न बाँकी रहेको ऋण उठाउन सबैले पहल गर्नुपर्ने र आ आफ्नो ठाउँबाट सबैजना आफु आफु सुध्रँदै जाने हो भने सहकारीमा कुनै समस्या नहरेको अध्यक्ष उप्रेतीले स्पष्ट पार्नुभयो । सहकारी संघ संस्था र  सदस्यहरुले पनि विभाग, महासंघ र केन्द्रीय संघहरुले समय समयमा जारी गरेका निर्देशनहरु पालना गर्दै सुशासित र समुदायमा आधारित सहकारी निर्माणमा जोड दिन अनुरोध गर्नुभयो ।  

राष्ट्रिय सहकारी महासंघका सञ्चालक टेक प्रसाद चौलागाईंले सहकारीमा सन्दर्भ व्याजदर पुनरावलोकन नहुँदा समस्या भएको र महासंघले त्यसका लागि निरन्तर लविइङ गरिरहेको बताउनुभयो । उहाँले सहकारी क्षेत्रमा विश्वासको संकट पैदा भएको उल्लेख गर्दै अनलाईन समाचारका पछि लागेर सत्य तथ्य र वास्तविकता नवुझिकन नकारात्मक धारणा निर्माण गर्दा सहकारी क्षेत्रप्रति गलत बुझाई विकास भएको उल्लेख गर्नुभयो ।  

कार्यक्रम सञ्चालन नेफ्स्कूनका सञ्चालक जिवसराज खड्काले गर्नुभएको थियो भने स्वागत मन्तव्य नेफ्स्कूनकी उपाध्यक्ष शान्ति अधिकारीले गर्नुभएको थियो । कार्यक्रमका सहभागीहरुलाई स्वागत गर्दै उपाध्यक्ष अधिकारीले नेफ्स्कूनको आगामी रणनीति तय गर्नका लागि सातै प्रदेशमा विस्तारित मञ्चका कार्यक्रम आयोजना गरिएको र सदस्यबाट प्राप्त सुझावहरुलाई ग्रहण गर्दै साधारणसभा मार्फत नीति निर्माणको चरणमा पुगिने बताउनुभयो ।