काठमाडौं । नेफ्स्कूनद्वारा मोरङको लेटाङमा सञ्चालित ५ दिवसीय उद्यमशिलता विकास तालिम सम्पन्न भएको छ । मंसिर १० देखि १६ गतेसम्म सञ्चालित तालिममा झापा र मोरङका विभिन्न बचत तथा ऋण सहकारी संस्थाबाट ३० जनाको सहभागिता रहेको थियो । तालिम प्रदेश नं.१, उद्योग वाणिज्य तथा उपभोक्ता हित संरक्षण निर्देशनालयको सहकार्यमा कृषि विकास बैंकको प्रादेशिक तालिम केन्द्रमा भएको थियो । नेफ्स्कूनको उद्यमशिलता विकास उपसमिति सदस्य एकराज निरौलाको अध्यक्षता र जिल्ला बचत संघ मोरङका अध्यक्ष सोमनाथ निरौलाको प्रमुख आतिथ्यतामा तालिमको समापन भएको थियो । 

उद्यमशिलता विकास तालिम व्यवसाय सुरु गर्ने समयमा अनिवार्य रुपले लिनुपर्ने तालिमका सहभागीहरुले बताएका थिए । समापन समारोहका अवसरमा तालिम सम्बन्धी प्रतिक्रिया दिँदै लेटाङ साकोसका प्रतिनिधि इन्द्रा तिमल्सीना र सहारा नेपाल साकोसका प्रतिनिधि युवकराज पौडेलले नवप्रवेशी उद्यमी र उद्यम सुरु  गरिसकेका दुवैलाई नै तालिम अत्यन्त उपायोगी र महत्वपूर्ण रहेको वताएका थिए । उनीहरुले तालिमबाट सिकेको ज्ञान सिप व्यवहारमा हुवहु लागु गर्न सके उद्यम व्यवसायबाट उत्कृष्ट प्रतिफल हासिल गर्न सकिने बताए । 

समापन समारोहका प्रमुख अतिथि एवम् जिल्ला बचत संघ मोरङका अध्यक्ष सोमनाथ निरौलाले तालिम लिनका लागि मात्र सीमित नभएर तालिमबाट प्राप्त ज्ञान सीपले उद्यमशिलता विकासमा ठोस योगदान पुर्याउनुपर्नेमा जोड दिनुभएको थियो ।

सभाध्यक्ष एकराज निरौलाले सहकारीको ध्येय नै उद्यमशिल सदस्य र सदस्यको समृद्ध जीवन निर्माण भएकोले सहकारीमार्फत उत्पादनमा जोड दिनुपर्ने बताउनुभयो । उहाँले गरिबी निवारणका लागि उत्पादन बढाउनुपर्ने हुँदा उद्यमशिलता विकासमा जोडिनुको विकल्प नभएको वताउनुभयो ।
स्थानीय निकायले प्रदान गर्ने उद्यमशिलता विकासको बजेट उपयोगका लागि समेत चनाखो भएर उद्यम विकासका काममा लाग्न सहभागीहरुलाई सुझाव प्रदान गर्नुभयो । 

तालिमको सहजीकरण नेफ्स्कूनका तालिम अधिकृत सुमनराज घिमिरे र अनुगमन अधिकृत रिता सुवेदीले गर्नुभएको थियो ।