काठमाडौं । ईटहरा बचत तथा ऋण सहकारी संस्था लि.ईटहरा मोरङको आयोजना र नेफ्स्कूनको प्राविधिक सहयोगमा एक्सेस मेची कोशी क्लष्टर पहिलोको ३१ औं कार्यकुशलता तथा सिकाई व्यवस्थापन कार्यशाला मंसिर १७ गते सम्पन्न भएको छ । एक्सेस ब्राण्डीङ कार्यक्रम एसियाली ऋण महासंघ (अकू) को प्राविधिक सहयोगमा साकोसहरुको विचमा विगत देखि नेफ्स्कूनले संचालन गर्दै आएको छ । 

यस क्लष्टरमा झापा, सुनसरी र मोरङका गरी जम्मा ७ ओटा (किसान कल्याण साकोस, महिला साकोस, रमाईलो जनएकता साकोस, मोरङ साकोस, मनकामना साकोस, सहारा नेपाल साकोस र इटहरा साकोस ) साकोसहरुको आवद्धता रहेको छ भने उक्त कार्यशालामा ७ ओटा साकोसकबाट ४३ जनाको सहभागिता रहेको थियो ।

आयोजक साकोसको अध्यक्ष विनोद घिमिरेको अध्यक्षतामा संचालन भएको कार्यशालामा नेफ्स्कूनका निर्वतमान कोषाध्यक्ष केशव प्रसाद पोख्रेलको विशेष अतिथ्यता र उर्लाबारी नगरपालिका उप प्रमुख मिना कुमारी पौडेलको प्रमुख आतिथ्यता रहेको थियो । 

कार्यक्रममा उर्लावारी नगरपालिकाकी उपप्रमुख एवम् प्रमुख अतिथि मिना कुमारी पौडेलले सिकाई निरन्तर प्रक्रिया रहने भएकोले सिकाईलाई वेवास्ता गरी व्यवहारमा कार्यान्वयन नगर्दाको परिणम हाल केही सहकारीहरुमा देखिएको बताउनुभयो । अब पनि हामीले सिकाईलाई व्यवहारमा परिणत गर्दै संस्थालाई नीति र विधिबाट संचालन गरेनौ भने कुनै न कुनै समय संस्थामा समस्या आउनसक्ने बताउनुभयो । उपप्रमुख पौडेलले सहकारी अर्थतन्त्रको तिनओटा खम्बा मध्ये एउटा बलियो खम्बा रहेको बताउदै अब सहकारीहरुले सदस्यहरुलाई आयआर्जन गर्ने क्षेत्रमा ऋणलागानीलाई प्रथमिकतामा राख्नुपर्ने बताउनुभएको थियो । सहकारीहरुले सदस्यहरुलाई वित्तको सदुपायोग गर्नको लागि सिकाउनुपर्ने कुरामा जोड दिनुभयो । 

नेफ्स्कूनका निर्वतमान कोषाध्यक्ष केशव प्रसाद पोख्रेलले नेफ्स्कूनले संचालन गरेको एक्सेस कार्यक्रमले संस्थालाई १ नम्बरको प्रतिस्पर्धी, सुशासनयुक्त र वित्तिय रुपमा सुरिक्षत संस्था निर्माण गर्दै आइरहेको बताउनुभयो  । संस्थाको वृद्धि र विकास तपाई हाम्रो सिकाईलाई व्यवहारमा कर्यान्वयनमा ल्याउँदामात्र सम्भव हुने कुरा बताउदै एक्सेसले संस्थाको चारओटा पक्षमा (वित्तिय, सदस्य दृष्टिकोण, आन्तरिक व्यवसायिक प्रक्रिया र निरन्तर सिकाई तथा वृद्धि)  विश्लेषण गरी संस्थालाई वित्तिय रुपमा सुरक्षित, चुनौतिहरुसंग सामना गर्ने शक्ति र सदस्यहरुलाई वित्तियरुपमा सवलिकरण गर्ने कार्यमा जोड दिएको बताउनुभयो ।  कार्यक्रमले संस्थाको सामाजिक रुपमा छवि स्थापित गाराउनका साथै जनविश्वास कायम गर्नको लागि सहजिकरण गरेको बताउनुभयो । 

ज्ञानवान संचालक समिति र सिपयुक्त कर्मचारीले मात्र संस्थाको वृद्धि र विकासका साथै सदस्यहरुलाई उचित सेवा प्रदान गर्न सक्ने भन्दै त्यसतर्फ ध्यान दिन आग्रह गर्नुभयो ।  हालको वित्तिय संकट सामना गर्नको लागि सहकारीका सञ्चालक र व्यवस्थापकको अनुभव साटासाटाबाट आन्तरिक व्यवस्थापन मजवुत बनाउनुपर्नेमा समेत पोखरेलको जोड थियो । 

नेफ्स्कूनका बरिष्ठ सूचना प्रविधि अधिकृत सितल थपलियाले सूचना प्रविधि मार्फत साकोसमा आउनसक्ने जोखिम र उक्त जोखिम न्यूनिकरणको विषयमा सहजिकरण गर्नुभएको थियो भने  एक्सेस कार्यक्रमको सूचकका आधारमा संस्थाको प्रस्तुतिकरणका आधारमा कार्यक्रम अधिकृत कोमल राज अधिकारील सहजिकरण गर्नुभएको थियो ।