भक्तपुर । साकोस अभियानमा नमुनायोग्य नेतृत्व विकास गर्ने उद्देश्यसहित नेफ्स्कूनको आयोजनामा सुरु भएको २ दिने सहजकर्ता अभिमुखीकरण आज सम्पन्न भएको छ । अभिमुखीकरणमा देशभरका बचत तथा ऋण सहकारी अभियानका २८ जना प्रशिक्षार्थीहरु सहभागी थिए । 

दुई दिने कार्यक्रम सहजीकरण नेफ्स्कूनका पूर्व अध्यक्ष ऋषिराज घिमिरे, सहकारी विभागका उपरजिष्ट्रारा टोलराज उपाध्याय, नेफ्स्कूनका महासचिव दामोदर अधिकारी र प्राचार्य सञ्जयराज तिमिल्सीनाले गर्नुभएको थियो । नेफ्स्कूनका अध्यक्ष परितोष पौड्याल र प्रमुख कार्यकारी अधिकृत प्रकाश प्रसाद पोखरेलले पनि अभिमुखीकरणमा मार्गदर्शक अभिव्यक्ति सहित निर्देशन तथा सहजीकरण गर्नुभएको थियो ।  

कार्यक्रम समापनका अवसरमा संम्बोधन गर्दै संघका पूर्व अध्यक्ष घिमिरेले साकोस अभियान शुद्धीकरण तथा सबलीकरणको लागि बचत तथा ऋण सहकारी ऐन आवश्यक रहेको र अभियानले पनि त्यसको लागि बहस पैरवी गर्नुपर्ने बताउनुभयो । उहाँले विश्व ऋण परिषद्ले प्रवर्धन गरेको बचत ऋण सहकारीका ४ सिद्धान्तहरुको परिपालनामा साकोसहरुले जोड दिनुपर्ने चर्चा गर्नुभयो । पूर्व अध्यक्ष घिमिरेले कार्यक्रममा सहभागी सम्पूर्ण व्यक्तिहरु साकोस अभियानको सम्पत्ति भएको र प्राप्त सिकाइलाई निरन्तर वृद्धि गर्दै साकोस अभियानको राजदुतको रुपमा कार्य गर्न आव्हान गर्नुभयो । साकोस अभियानको शुद्धीकरण र सुदृढीकरणको लागि हामी सबैको भुमिका अहम् हुने हुँदा निरन्तर शिक्षा लिने र दिने कार्यमा क्रियाशिल रहनुपर्नेमा जोड दिनुभयो । 

अभिमुखीकरणमा सहभागी प्रशिक्षार्थीहरुलाई कार्यक्रम समापन समारोहका प्रमुख अतिथि नेफ्स्कूनका पूर्व अध्यक्ष घिमिरे र संघका महासचिव अधिकारीले प्रमाण पत्र प्रदान गर्नुभएको थियो ।

कार्यक्रम सञ्चालन संघका शिक्षा तथा स्रोत केन्द्रका प्राचार्य सञ्जयराज तिमिल्सीनाले गर्नुभएको थियो ।