तनहुँ । श्री जनज्योती बचत तथा ऋण सहकारी संस्था लि.का सञ्चालक समिति उपसमिति तथा कर्मचारीहरुले संस्थागत विकास तालिम लिएका छन् । तनहुँको बन्दीपुरमा आश्विन २८ देखि ३० गते सम्म सञ्चालित तालिमको उद्घाटन सत्र साकोसका अध्यक्ष रविन भुजेलको अध्यक्षता र नेफ्स्कूनका अध्यक्ष परितोष पौड्यालका प्रमुख आतिथ्यतामा भएको थियो । तालिम उद्घाटन सत्रमा भानु नगरपालिकाका नगर प्रमुख आनन्द राज त्रिपाठी, अधिवक्ता शिव कुमार अधिकारीको विशेष आतिथ्यता रहेको थियो । 

नेफ्स्कूनका अध्यक्ष परितोष पौड्यालले सहकारीको समसामयिक वस्तुस्थिति, संघले अभियानमा खेलेको भूमिका तथा साकोसले गर्नुपर्ने कामहरुबारे जानकारी गराउनुभएको थियो । सहकारीले तरलता व्यवस्थापनमा ध्यान दिँदै सदस्यको बचतको सुरक्षामा लाग्नुपर्ने, नीति, विधि र प्रविधि प्रयोगमा जोडदिनुपर्ने भन्दै बचत तथा ऋण सहकारी संस्थाका लागि आवश्यक जस्तो सुकै सहयोग गर्न नेफ्स्कून तयार रहेको प्रतिवद्धता व्यक्त गर्नुभएको थियो । उहाँले संस्थागत विकास तालिमले संस्था सञ्चालनमा प्रभावकारीता ल्याउने हुँदा तालिमबाट प्राप्त ज्ञान सीपको प्रभावकारी कार्यान्वयका लागि आग्रह गर्नुभएको थियो । 

भानु नगरपालिकाका प्रमुख आनन्द राज त्रिपाठीले स्थानीय तहमा जति पनि विकास भएको छ त्यो सवै भौतिक विकास मात्र भएको र अब आर्थिक विकासमा लाग्नुपर्ने आवश्यकता रहेको औल्याउनुभयो । स्थानीय बासीहरुको आर्थिक विकासका लागि सहकारी मात्र एक उत्तम विकल्प रहेको उहाँले बताउनुभयो । उद्यमशिलता विकासका कार्यक्रमहरु सहकारीमार्फत गर्न नगरपालिकाको पनि सोच रहेकोले जनज्योती साकोससँगको सहकार्यमा कार्यक्रम अगाडि बढ्ने विश्वास लिएको नगर प्रमुख त्रिपाठीले बताउनुभयो । उहाँले नेफ्स्कूनले विकास गरेको आधारशिला कार्यक्रमसँग सम्झौता गरी नगरपालिकाले सहकारीको वृद्धि विकास साथै आर्थिक विकासका कार्यक्रम गर्न तत्पर रहेको जानकारी गराउनुभयो ।

तालिममा सञ्चालक समिति, लेखा सुपरिवेक्षण समिति लगायत उपसमिति र व्यवस्थापनका गरी २७ जनाको सहभागिता रहेको थियो । तालिमको सहजीकरण बरिष्ठ कार्यक्रम अधिकृत भरत प्रसाद न्यौपाने र तालिम अधिकृत रविन्द्र श्रेष्ठले गर्नु भएको थियो ।