काभ्रे । पाँचखाल ४, काभ्रेस्थित स्वेच्छा बचत तथा ऋण सहकारी संस्था लि.को बाह्रौं बार्षिक साधारणसभा आज, असोज २ गते सम्पन्न भएको छ । सभामा साकोसका अध्यक्ष ओमकार क्षेष्ठको अध्यक्षता, नेफ्स्कूनका अध्यक्ष परितोष पौड्यालको प्रमुख आतिथ्यता र जिल्ला बचत संघ काभ्रेका अध्यक्ष उद्धव प्रसाद अधिकारी र जिल्ला सहकारी संघ काभ्रेका सञ्चालक सदस्य ठाकुरनाथ अधिकारीको आतिथ्यता रहेको थियो । 

साधारणसभा उद्घाटनका अवसरमा बोल्दै प्रमुख अतिथि अध्यक्ष पौड्यालले सहकारी संस्था सञ्चालनमा नीति, विधि र प्रविधिमा एकरुपता आउनुपर्ने बताउनुभयो । सूशासित साकोस अभियान निर्माणका लागि स्तरीकरण कार्यक्रमको अनिवार्य आद्धताबारे जानकारी गराउनुभयो । उहाँले साकोस सुरक्षाका लागि स्तरीकरण, स्थिरीकरण कोषको उपयोगिताबारे चर्चा गर्नुभयो । 

उहाँले पछिल्लो समय सहकारी क्षेत्रमा देखिएको तरलता अभावको समस्या समाधानका लागि सहकारीको सन्दर्भ व्याजदरमा तत्काल पुनरावलोकन आवश्यक भएको बताउनुभयो । उहाँले विभाग समक्ष सन्दर्भ व्याजदर पुनरावलोकनका लागि अभियानको तर्फबाट सुझाव सहितको माग राखिने स्पष्ट पार्नुभयो । 

२०६७ सालमा स्थापना भएको स्वेच्छा साकोसमा हाल १ हजार ६० सदस्य छन् । साकोसले जगेडा कोष र संरक्षित पुँजी फिर्ता कोषमा करिब ७ ७ लाख रुपैंया छुट्याएको छ भने सदस्यहरुका लागि १५ प्रतिशत लाभांश पारित गरेको छ । साकोसको कुल वासलात करिब २० करोड रहेको छ । 
साधारणसभाले साकोसका विभिन्न सेवामा उत्कृष्ट कारोबार गर्ने सदस्यहरु, जेष्ठ सदस्य, असल ऋषि, बाल बचतकर्ताहरु लगायतलाई सम्मान तथा कदरपत्र प्रदान गरेको थियो ।