काठमाडौं । नेपाल बचत तथा ऋण केन्द्रीय सहकारी संघ लि.(नेफ्स्कून) का अध्यक्ष परितोष पौड्यालले सहकारीको सन्दर्भ व्याजदर तत्काल पुनरावलोकन गर्नुपर्नेमा जोड दिनुभएको छ । 

असोज १ गते, शनिबार भक्तपुरस्थित चमेली कल्याणकारी साकोसको २०औं बार्षिक साधारणसभाको उद्घाटन सत्र सम्बोधनका क्रममा अध्यक्ष पौड्यालले सहकारी एकातिर सन्दर्भ व्याजदर र अर्कोतिर खुला बजार चेपुवामा परेका कारण समस्यामा परेकोभन्दै व्याजदर पुनराबलोकनका लागि माग गर्नुभएको हो । उहाँले बैंक वित्तीय संस्थाहरुले व्याजदर बढाएर लगानी गरिरहेको प्रशङ्ग उल्लेख गर्दै सहकारी क्षेत्र त्यसको प्रत्यक्ष चेपुवामा परेकोले अब तत्काल व्याजदर पुनरावलोकन नभए सम्पूर्ण सहकारीकर्मीहरु एकजुट भएर त्यसको समाधानमा उत्रने बताउनुभएको हो । 

अध्यक्ष पौड्यालले अबका दिनमा सहकारी संस्थाहरुले कार्यक्षेत्रभित्र रहेका अन्य सहकारीसँग मर्जरको बाटोमा जानुपर्ने बताउनुभयो । नेफ्स्कूनले सहकारीबाट सबै प्रकारका सेवा एकसाथ प्रवाह गर्न सक्नेगरि आधुनिक यात्राको थालनी गरिसकेको र अबका दिनमा सबै सहकारीले डिजिटाइजेसन, डिजिटलाइजेशन, डिजिटल ट्रान्सफरमेशन एवं डिजिटल इन्फरमेशनको मार्गमा अघि बढ्नुपर्ने बताउनुभयो । 

चमेली कल्याणकारीको साधारणसभाले प्रमोद घिमिरेको अध्यक्षतामा नयाँ सञ्चालक समिति र शालिकराम घिमिरेको संयोजकत्वमा लेखा सुपरिवेक्षण समिति चयन गरेको छ । त्यस्तै सञ्चालक समिति सदस्यहरुमा श्रीराम न्यौपाने, तिर्थराज चौलागाई, सन्तोष कार्की, अम्बिका चौलागाई घिमिरे, प्रकाश न्यौपाने, रमिला खत्री खड्का एवं विना गिरी निर्वाचित हुनुभएको छ । साधारण सभाबाट शालिकराम घिमिरेको संयोजकत्वमा सञ्जय मिश्र र शरद रिसाल लेखा सुपरिवेक्षण समिति सदस्यमा चयन हुनुभएको छ । 

सभामा संस्थाका सचिव मिठमराम न्यौपानेले संस्थाको गत वर्ष सम्पन्न भएको कार्यक्रम र आगामी वर्षको कार्यक्रम प्रस्तुत गर्नुभएको थियो ।

संस्थाका कोषाध्यक्ष शालिकराम घिमिरेले संस्थाको वित्तीय अवस्था र आगामी वर्षको वजेट प्रस्तुत गर्नुभएको थियो । त्यसैगरी लेखा सुपरिवेक्षण समितिका संयोजक प्रमोद घिमिरेले संस्थाको लेखा समितिको प्रतिवेदन पेस गुर्नभएको थियो ।

प्रस्तुत प्रतिवेदन अनुसार संस्थाको आर्थिक वर्ष ०७८ / ०७९ मा ४ हजार २ सय ७७ जना सदस्य तथा ५ करोड २४ लाख २१ हजार ६ सय रुपैयाँ शेयर पूँजी पुगेको छ भने ५५ करोड ७३ लाख ५० हजार ६ सय ३० रुपैयाँ बचत र ५७ करोड ८६ लाख ६५ हजार ९ सय ८५ रुपैयाँ ऋण लगानी रहेको जनाइएको छ ।

कार्यक्रममा जिल्ला सहकारी संघ भक्तपुरका उपाध्यक्ष कृष्णबहादुर धजु, भक्तपुर जिल्ला बचत तथा ऋण सहकारी संघका लेखा सुपरिवेक्षण समितिका संयोजक बालमुकुन्द उपाध्याय लगायतले शुभकामना मन्तव्य राख्नुभएको थियो । कार्यक्रममा संस्थाका ज्येष्ठ सदस्य एवं एसइई परीक्षामा सर्वोत्कृष्ट नतिजा ल्याउने सदस्य परिवारलाई समेत सम्मान गरिएको थियो ।