बुटवल, भाद्र २८ ।
रुपन्देही बचत तथा ऋण सहकारी संघ लि. रुपन्देहीको आयोजनामा १ दिने “सहकारीमा सम्पत्ति शुद्धीकरण निवारण सम्बन्धी अभिमुखिकरण कार्यक्रम” बुटवलमा सम्पन्न भएको छ । सम्पत्ति शुद्धीकरण सम्बन्धमा भएका प्रचलित ऐन नियम तथा सहकारी संस्थाहरुले पुरा गर्नु पर्ने कानुनी दायित्वका बारेमा जिल्लाका सहकारी संस्थाका प्रतिनिधिहरुलाई जानकारी गराइएको थियो ।

रुपन्देही बचत तथा ऋण सहकारी संघ लि.ले आफ्ना सदस्य संस्थाहरुको क्षमता अभिबृद्धिका लागि आयोजना गरेको अभिमुखीकरण कार्यक्रममा विभिन्न संस्थाका पदाधिकारी तथा ब्यवस्थापकहरु गरि ८४ जना सहभागी भएका थिए । 

तालिमको शुरुवातमा संघका सञ्चालक तथा शिक्षा उपसमिति संयोजक भरतराज भूसालको अध्यक्षतामा संक्षिप्त उद्घाटन कार्यक्रम सम्पन्न भयो । संयोजक भूसालले सहकारीमा जनशक्ति विकासमा हुने खर्चलाई संस्थाले लगानीको रुपमा लिनु पर्ने र जनशक्ति विकासमा यथेष्ट ध्यान दिन अनुरोध गर्नु भयो । सञ्चालकहरु ब्यवस्थापक बन्ने र ब्यवस्थापकहरुलाई लेखापाल बनाएका संस्थाहरुमा संकट आएको बताउदै भूसालले ब्यवस्थापकहरुलाई सहि अर्थमा ब्यवस्थापक बनाउन उनिहरुको क्षमता विकास गर्न र संस्थामा लिखित विधि र कानूनको निशर्त परिपालनामा सबैलाई अपिल गर्नु भएको थियो । 

संघका अध्यक्ष प्रकास भट्टराईको प्रमुख आतिथ्यतामा भएको कार्यक्रममा अध्यक्ष भट्टराईले नीति, विधि र प्रविधि विना अव साकोस अभियान अगाडि नबढ्ने कुरा बताउनु भयो । उपाध्यक्ष कृष्ण चौहान क्षेत्रीले स्वागत मन्तब्य ब्यक्त गर्नु भएको थियो । संघका सञ्चालक रामप्रसाद आचार्य, नेफ्स्कून बुटवलका प्रमुख छत्रप्रसाद धमला र राष्ट्रिय सहकारी बैंक बुटवलका प्रबन्धक नारायण बेल्वासेले तालिमको सफलताको श्ुभकामना दिनुभएको थियो । 
विभिन्न तलिमहरुले ग्रामिण क्षेत्रमा रहेका कम पुँजीका सहकारीहरुका लागि पनि सिकाइको अवसर दिएको हौसला बचत तथा ऋण सहकारी संस्था लि.का मथुरा भण्डारीको भनाई रहेको थियो ।

उक्त अभिमुखीकरण तालिमको सहजीकरण नेफ्स्कूनका कार्यक्रम अधिकृत मनोज खड्काले गर्नु भएको थियो । कार्यक्रमको सञ्चालन संघका ब्यवस्थापक तथा नेफ्स्कून सँगको साझेदारी कार्यक्रमका फोकल पर्सन सर्मिला भट्टराई गौतमले गर्नु भएको थियो ।

 रुपन्देही बचत तथा ऋण सहकारी संघले यस अगाडि पनि नतिजामुखी र आवश्यकताका आधारमा विभिन्न तालिम दिने तथा सदस्य संस्थाको नीति तथा कार्यविधि बनाउने कार्यमा सहयोग गर्दै आइरहेको छ ।