ललितपुर । राष्ट्रिय सहकारी महासंघले  २०७९ मंसिर ४ गते हुने प्रदेश सभा तथा प्रतिनिधिसभा निर्वाचनमा राजनीतिक दलहरुका घोषणापत्रमा  सहकारीका मुद्दाहरुलाई समेट्न आग्रह गर्दै सुझाव पेश गरेको छ ।  मंगलबार महासंघका अध्यक्ष मिनराज कडेल र वरिष्ठ उपाध्यक्ष ओमदेवी मल्लले नेकपा (एमाले) का महासविच शंकर पोखरेल र माओवादी केन्द्रका वरिष्ठ उपाध्यक्ष नारायणकाजी श्रेष्ठलाई घोषणापत्रमा सहकारीका मुद्दा समेट्न आग्रह गर्दै सुझाव दिनुभएको थियो । 

आगामी संसदीय निर्वाचनका लागि पार्टीहरु घोषणापत्र तयारीमा जुटिरहेको समयमा महासंघले सहकारी अभियानकोतर्फबाट दलहरुलाई सुझाव दिन थालेको हो । महासंघका अध्यक्ष मिनराज कडेलले सबै दललाई सुझाव दिने तयारी गरिरहेको बताउनुभयो । उहाँले भन्नुभयो, ‘हामीले दलहरुलाई सहकारीको अभियानको तर्फबाट घोषणपत्रमा समेट्नुपर्ने सहकारीका मुद्दाका विषयमा बुँदागत रुपमा सुझाव पेश गरेका छौं । उहाँहरु सकारात्मक रहेको र प्राप्त सुझावलाई अध्ययन गरेर समेट्ने प्रतिबद्धता व्यक्त गर्नुभएको छ ।’ कतिपय दलहरुले महासंघमा सम्पर्क गरेर समेत सहकारीका समेट्नुपर्ने विषयहरु माग गरेका छन्, अन्य दलहरुसँग पनि समय मिलाएर छिट्टै सुझाव दिने कडेलले बताउनुभयो ।