काठमाडौं । मोरङको पथरी शनिश्चरेमा अवस्थित शनिश्चरे बचत तथा ऋण सहकारी संस्था लि.को २१औं वार्षिक साधारणसभाले नयाँ नेतृत्व चयन गरेको छ । साकोसका अध्यक्ष एकराज निरौलाको निरन्तरको मेहनत र परिश्रमले शनिश्चरे साकोसलाई प्रगतिउन्मुख बनाएको छ । २०५९ कात्तिक ३ गते स्थापना भएको शनिश्चरे साकोस पथरी बजारबाट करिब ५ किलोमिटर दक्षिणमा पर्छ । स्थानीय ग्रामिण समुदायमा केन्द्रीत सहकारी जसमा निम्न र मध्यम आय भएका सदस्यहरुको बाहुल्यता रहेको छ । विशेष गरी सुकुम्बासी क्षेत्रका समुदायको आवद्धता साकोसमा उच्च रहेको पाईन्छ । १ हजार ५ सय ४६ सदस्य रहेको साकोसको कुल कारोबार करिब ६ करोड ५० लाख पुगेको छ । 

जोखिममा आधारित साकोस सुपरिवेक्षण कार्यक्रममा समेत आवद्ध पथरी शनिश्चरे साकोस वित्तीय कारोबारमा सानो भएपनि सहकारीको सिद्धान्त, नीति र विधिको परिपालनामा भने अब्बल छ । विभिन्न समिति उपसमिति निर्माण गरी नीति तथा कार्यविधि मार्फत मात्रै सहकारी सञ्चालन र वित्तीय कारोबार सम्बन्धी निर्णय गर्ने गरिएको साकोसका अध्यक्ष निरौलाले जानकारी दिनुभयो । 
सहकारी सिद्धान्तमा अब्बल शनिश्चरे साकोसलाई मोरङ जिल्ला बचत संघले उत्कृष्ठ सहकारीमा सम्मानित समेत गरिसकेको छ । 

धेरै सदस्य र वृहत्त पुँजी संकलन गरेका केही सहकारीहरुमा पछिल्लो समय देखिएको वित्तीय अपचलन विषयका समाचाहरुले प्रमुखता पाइरहेका अवसरमा शनिश्चरे साकोसको कछुवा गति र सहकारी सिद्धान्तको असल अभ्यासले वास्तविक सहकारीको पहिचान स्थापित गराउन सफल भएको छ । स्थानीय समुदाय र सदस्यको सुख दुःखको साथी भएर शनिश्चरेले असल छवि स्थापित गरेको छ भने सदस्यहरुको वित्तीय आवश्यकता पनि बखुवी निभाएको छ । 

शनिश्चरे साकोसको विकास र प्रवद्र्धनका लागि लगातार १६ बर्षदेखि विभिन्न पदमा रहेर नेतृत्व सम्हाल्दै आउनुभएका एकराज निरौलाले नेतृत्व हस्तान्तरण गदै नयाँ नेतृत्वलाई अभिभावकत्व प्रदान गर्ने बचनबद्धता व्यक्त गर्नुभएको छ । ३ कार्यकाल अध्यक्षको जिम्मेवारीमा रहि साकोसलाई नीति, विधि, प्रविधि र पद्धतिमा हिडाउँन गरेका अथक प्रयासलाई जोगाउँदै संस्थालाई गतिशिलता र उर्जा प्रदान गर्न उर्जाशिला नयाँ नेतृत्व र युवा जोससहितको सञ्चालक समिति स्थापित भएकोमा सुखानुभूति भएको उहाँले स्पष्ट पार्नुभएको छ ।  अध्यक्ष निरौला जिल्ला बचत संघ मोरङको सचिव हुनुहुन्छ भने नेपाल बचत तथा ऋण केन्द्रीय सहकारी संघ लि.(नेफ्स्कून) को उद्यमशीलता उसमिति सदस्य समेत हुनुहुन्छ । 

२१औं वार्षिक साधारणसभाबाट निर्वाचित सञ्चालक र लेखा समिति

शनिश्चरे साकोसको भाद्र २५ गते शनिबार सम्पन्न २१औं बार्षिक साधारणसभाले खगेन्द्र प्रसाद दाहालको अध्यक्षतामा १२ सदस्यीय सञ्चालक समिति र मान बहादुर गुरुङको संयोजकत्वमा ३ सदस्यीय लेखा सुपरिवेक्षण समिति निर्वाचित भएको छ । समितिको उपाध्यक्षमा (खुल्ला) दिपेन्द्र पाण्डे, (महिला) उपाध्यक्ष तुलसा न्यौपाने, सचिव थानेश्वर भट्टराई, सहसचिव पवित्रा ओडारी, कोषाध्यक्ष महेन्द्र बहादुर कार्की, सदस्यहरुमा विष्णु अधिकारी (खुल्ला) , टेकबहादुर थापा, ज्ञानेन्द्र दाहाल, बसन्त तामाङ,  सदस्य (महिला) मञ्जु फुयाल उप्रेती, विन्दा भट्टराई न्यौपाने, विन्दा गौतम पौडेल रहनुभएको छ । त्यसैगरी लेखा सुपरिवेक्षण समिति तर्फ संयोजक मान बहादुर गुरुङ र सदस्यहरुमा भवनाथ पोख्रेल र अमृता तामाङ चयन हुनुभएको छ ।