कञ्चनपुर । कोअपरेटिभ म्यानेजर्स क्लब (सिएमसी) कञ्चनपुरको आयोजना र नेपाल बचत तथा ऋण केन्द्रीय सहकारी संघ लिमिटेड (नेफ्स्कून) को प्राविधिक सहयोगमा भाद्र २० र २१ गते सञ्चालित बार्षिक योजना तथा बजेट निर्माण तालिम मंगलबार सम्पन्न भएको छ । 

सिएमसी कञ्चनपुरका अध्यक्ष गणेश भट्टको अध्यक्षतामा सञ्चालन भएको तालिमको समापन नेफ्स्कूनका महासचिव दामोदर अधिकारीले गर्नुभएको थियो । 

नेफ्स्कूनका महासचिव अधिकारीले नेफ्स्कूनका सबै प्रकारका बस्तु तथा सेवाहरु लिएर सबल, दिगो र सुशासित साकोस निर्माणमा पहल गर्न सहभागीहरुलाई अनुरोध गर्नुभएको थियो । नेफ्स्कून बचत तथा ऋण सहकारी संस्थाको एक मात्र केन्द्रीय संघ भएको र साकोसका हरेक समस्याको समाधानको सामथ्र्य राख्न सक्ने संघ भएकोले ढुक्कसँग नेफ्स्कूनका सेवाहरु लिन र साकोसमा आईपर्न सक्ने समस्याको समाधान नेफ्स्कून मार्फत गर्न सकिनेमा जोड दिनुभएको थियो । उहाँले बचत तथा ऋणको कारोबार गर्ने संस्था अन्यको तुलनामा अझ बढी संवेदनशील हुनेहुँदा सहकारीमा सुशासन कायम गर्नुपर्नेतर्फ सबैको ऐक्यवद्धता आवश्यक रहने बताउनुभयो ।  

दुई दिने तालिमको सहजीकरण महासचिव दामोदर अधिकारी र नेफ्स्कूनका तालिम अधिकृत रविन्द्र श्रेष्ठले गर्नुभएको थियो । 

तालिममा विभिन्न बचत तथा ऋण सहकारी संस्थाबाट ३० जनाको सहभागिता रहेको थियो । तालिम सहजीकरणका क्रममा सहजकर्ता अधिकारीले विभिन्न उत्प्रेरणात्मक र रणनीति निर्माण योजनाका तौरतरिकाहरु बारे प्रयोगात्मक अध्यास समेत गराउनुभएको थियो । 

कार्यक्रम सञ्चालन तथा ब्यवस्थापन कञ्चनपुर कोअरेटिभ म्यानेजर्स क्लवका सचिव वसन्त भट्टले गर्नुभएको थियो ।

कार्यक्रममा जिल्ला बचत तथा ऋण सहकारी संघ लि.कञ्चनपुरका अध्यक्ष भवानि चन्द, कञ्चनपुर कोओपरेटिभ म्यानेजर्स क्लवका संस्थापक अध्यक्ष कमला भण्डारी, नेफ्स्कूनका तालिम अधिकृत रबिन्द्र श्रेष्ठ, कञ्चनपुर फिल्ड कार्यालय ईन्चार्ज यम बहादुर डाँगी लगायतको उपस्थिति थियो ।