काठमाडौं । एशियाली क्रेडिट युनियनहरुको फोरम २०२२, अगस्ट २९ देखि सेप्टेम्बर १ तारिख (२०७९ भाद्र १३ देखि १६) सम्म थाइल्याण्डको बैंककमा आयोजना हुँदैछ । फोरममा सहभागिताका लागि आज नेफ्स्कूनका अध्यक्ष परितोष पौड्याल, प्रमुख कार्यकारी अधिकृत प्रकाश प्रसाद पोखरेल सहित बचत तथा ऋण सहकारी अभियानकर्मीहरु थाइल्याण्डको बैंकक प्रस्थान गर्नुभएको छ । नेफ्स्कूनका बरिष्ठ उपाध्यक्ष चन्द्र प्रसाद ढकाल, सहायक कार्यकारी अधिकृत एवम् प्राचार्य सञ्जयराज तिमिल्सीना र सहायक कार्यकारी अधिकृत एवम् प्रशासन विभाग प्रमुख राधेश्याम श्रेष्ठले सहभागीहरुलाई विमानस्थलबाट सहभागिताका लागि शुभकामना सहित विदाई गर्नुभएको थियो । केही सहकारीकर्मीहरु भने फोरम सहभागिताका लागि भोलि बैंकक जाँदै हुनुहुन्छ । 

अक्कू फोरम २०२२ ले यस बर्षका लागि “कोभिड १९ बाट पुर्नउत्थानका लागि हरित समावेशी तथा सामनाशक्ति विकासको मार्ग” (Greener, Inclusive, Resilient Path to COVID-19 Recovery) भन्ने थिम तय गरेको छ । फोरमसँगै एशियाली ऋण महासंघको ४१औं चुनावी साधारणसभा समेत सम्पन्न गर्ने कार्यक्रम रहेको छ । उक्त साधारणसभाले आगामी कार्यकालका लागि नयाँ नेतृत्व चयनका साथै अभियानलाई नयाँ मार्गदर्शन गर्नेछ । उक्त फोरममा नेपाल लगायत १६ देशका ३३५ बचत ऋण सहकारी अभियानकर्मीहरु सहभागी हुनेछन् ।

एशियाली ऋण महासंघ (ACCU), क्रेडिट युनियन लिग अफ थाइल्याण्ड (CULT) र थाइल्याण्डको बचत तथा ऋण सहकारी महासंघ (FSCT) को संयुक्त आयोजना रहेको अक्कू फोरमले महामारी र जलवायु परिवर्तनको प्रभावले क्रेडिट युनियनहरुको इच्छालाई सँधै चुनौति दिइरहेको, जसले आफ्ना सदस्यहरुको जीवनस्तर सुधार गर्न, गरिब र प्रभावित साथै विश्वव्यापी आय वितरणको तल्लो ६० प्रतिशत घरपरिवारको रुपमा रहेका सदस्यहरुको लागि आवश्यक रिकभरीका समावेशी र लचिलो उपायमार्फत परिवर्तनको अनुभव दिलाउन प्रयत्नरत रहने जनाएको छ । सो अवसरमा FSCT को ५०औं बार्षिकोत्सव समारोह समेत एकसाथ मनाइँदैछ ।