काठमाडौं । साकोस स्तरीकरण कार्यक्रममा सहभागी हुन बाँकी रहेका काठमाडौं र भक्तपुरका केही बचत तथा ऋण सहकारी संस्थाहरुलाई आज नेफ्स्कूनको आयोजनामा अभिमुखीकरण गरिएको छ । नेफ्स्कून तालिम केन्द्र चाबहिलको सभाहलमा आयोजित अभिमुखीकरण कार्यक्रममा काठमाडौं र भक्तपुरमा सञ्चालित १५ बचत तथा ऋण सहकारी संस्थाबाट २३ जना प्रतिनिधिहरुको उपस्थिति रहेको थियो । साकोस सञ्चालनमा शुद्धीकरण र संस्थागत सुदृढीकरणमा जोड दिन स्तरीकरण कार्यक्रमको महत्व र उपादेयतामाथि अभिमुखीकरण कार्यक्रमको जोड रहेको थियो ।
 
नेफ्स्कूनका सञ्चालक सदस्य एवं चाबहिल फिल्ड कार्यालय व्यवस्थापन उपसमिति संयोजक न्हुच्छे नारायण श्रेष्ठको अध्यक्षतामा आयोजित कार्यक्रममा प्रमुख व्यक्ति नेफ्स्कूनका कोषाध्यक्ष दिपक पनेरु सहित संघका प्रमुख कार्यकारी अधिकृत प्रकाश प्रसाद पोखरेल र सहायक कार्यकारी अधिकृत एवम् सदस्य सेवा विभाग प्रमुख गणेश प्रसाद तिमल्सिना उपस्थित हुनुहुन्थ्यो । 

कोषाध्यक्ष दिपक पनेरुले बचत तथा ऋण सहकारी अभियान शुद्धीकरणका लागि नेफ्स्कूनले सुरु गरेका स्तरीकरणका कार्यक्रमहरु उपलब्धीमूलक रहेको प्रष्ट्याउँदै संस्थागत दिगो विकासका लागि कार्यक्रम आबद्धताको विकल्प नभएको उल्लेख गर्नुभयो । साकोसको संस्थागत सुदृढीकरणका लागि स्तरीकरण कार्यक्रम, साकोस सुरक्षा कवचको रुपमा स्थिरीकरण कोष र नीति, विधि, प्रविधि एकरुपताका लागि एकीकृत प्रविधि प्रणालीमा जोडिनु आजको आवश्यकता रहेको चर्चा गर्दै सर्वप्रथम स्तरीकरण कार्यक्रम आबद्धताका लागि आव्हान गर्नुभयो । 

प्रमुख कार्यकारी अधिकृत प्रकाश प्रसाद पोखरेलले साकोस अभियानको अबको जोड भनेको स्तरीकरण, सुशासन प्रवर्धन र प्रविधिकरण मार्फत सुशासित र सुव्यवस्थित साकोस सञ्चालन रहेको बताउनुभयो । उहाँले साकोसको गुणस्तर सुधारका नीम्ति स्तरीकरण कार्यक्रम प्रोबेसनले स्वस्थ र सुरक्षित वित्तीय कारोबारमा जोड दिने हुँदा उपस्थिति साकोस प्रतिनिधिहरुलाई कार्यक्रम आबद्धताका लागि अनुरोध गर्नुभयो ।

कार्यक्रम सहजीकरण सहायक कार्यकारी अधिकृत तिमल्सिनाले र कार्यक्रम सञ्चालन बरिष्ठ अधिकृत भरत प्रसाद न्यौपानेले गर्नुभएको थियो ।