भक्तपुर । सूर्यविनायक नगरपालिकाकी नगर उपप्रमुख सरिता भट्टराईले सहकारी संघ संस्थाले गर्ने हरेक निर्णय सहकारीका ऐन नियम र निर्देशनलाई विचार गरेर मात्र गर्नुपर्ने बताउनुभएको छ । 

भक्तपुर जिल्ला बचत संघको सुर्यविनायक नगर सहकारी समन्वय उपसमितिको आयोजनामा बुधबार सञ्चालित “सहकारी विभागबाट जारी ३५ बुँदे निर्देशन, COPOMIS र goAML” विषयक अन्तरक्रिया कार्यक्रमलाई सम्बोधन गर्ने क्रममा उपप्रमुख भट्टराईले सहकारी संघ संस्थाले सदस्यको बचतको सुरक्षामा विशेष चिन्ता राख्नुपर्ने भन्दै सहकारी मार्फत हुने गतिविधिमा सुशासन र पारदर्शिता कायम गर्नुपर्नेमा जोड दिनुभयो । 

उहाँले सहकारीको पैसा सहकारीमा राखेर अभियानलाई बलियो बनाउनुपर्ने बताउनुभयो । जस्तोसुकै समस्या पर्दापनि अभियानभित्रैबाट समस्या समाधान गर्न सकिने हुनुपर्छ, उहाँले भन्नुभयो, “एउटा संस्थालाई समस्या पर्दा अरु सहकारीलाई पनि असर पर्ने भएकोले विभागद्वारा जारी ३५ बुँदे निर्देशनको पालना गरी सुशासनमा रहन र स्तरीकरण कार्यक्रममा सहभागी भई गुणस्तर र क्षमतामा सुधार ल्याउन पहल गर्नुहोस् ।”

सहकारी क्षेत्रको विकास र प्रवर्धनका लागि सूर्यविनायक नगरपालिकाले आर्थिक बर्ष २०७९ /०८० मा सहकारी क्षेत्रमा ३१ लाख बजेट छुट्याएको पनि जानकारी गराउनुभयो । 

भक्तपुर जिल्ला बचत संघका अध्यक्ष कृष्ण गोविन्द लाखाजुले सहकारी विभागबाट जारी ३५ बुँदे निर्देशन विषयमा प्रस्तुत गर्दै निर्देशन सकारात्मक रहेको बताउनुभयो । निर्देशनमा हाल प्रक्रिया नपुर्याई दर्ता भएका बहुउद्देश्यीय सहकारीबारे मौन देखिएको र सहकारी सबैले वेवसाइट राख्ने र अद्यावधि गर्न नसकिने हुँदा सहकारीको कारोबारको आधारमा बर्गिकरण गरी अनिवार्य गर्नुपर्ने विचार व्यक्त गर्नुभयो ।

संघका व्यवस्थापक बालकृष्ण धोजुले कोपमिसको परिचय, कोपमिस प्रयोग गर्दाको फाइदा र हाल कोपमिसमा भएको अद्यावधिकाबारेमा प्रस्तुत गर्नुभयो । साथै goAML मा दर्ता र प्रतिवेदनहरु कसरी अनलाइनबाट बुझाउने भन्नेबारेमा समेत प्रस्तुतीकरण गर्नुभयो । राज्यले सहकारी प्रवर्धन र विकासको लागि नै नयाँ प्रविधिहरुको विकास गरिने भएकोले सकारात्मक सोचका साथ कोपमिस र goAML सफ्वेयरमा आबद्ध भई कार्यान्वयन गर्नुपर्नेमा जोड दिनुभयो ।

कार्यक्रमका सभापति संघका संचालक एवम् उपसमितिका संयोजक काजी बहादुर पञ्चले कार्यक्रममा प्रस्तुत भएको ३५ बुँदे निदेशन, कोपमिस र goAMLमा आबद्ध हुनु अनुरोध गनुभयो । हाल सहकारीमा सुशासनकै अभावमा संचालकले घर जग्गामा लगानी, संचालकको स्वार्थ र कर्मचारीको बदमासीले समस्याहरु देखिएको बताउनुभयो । 

कार्यक्रममा स्वागत मन्तव्य उपसमितिका सदस्य कंचन कृष्ण न्यौपानेले गर्नुभयो । अन्र्तक्रिया कार्यक्रममा सूर्यविनायक नगरका सहकारी संस्थाका अध्यक्ष र व्यवस्थापक गरी ५४ जनाको सहभागिता रह्यो । कार्यक्रमको संचालन उपसमितिका सदस्य मिठारा न्यौपानेले गर्नुभएको थियो ।