सहकारीको लगानीमात्र सुरक्षित खोजेर हुदैन्, जनताको बचत पनि सुरक्षित हुने वातावरण तयार गर्नुहोस् 

म्याग्दी । पूर्ण तथा व्यावसायिक साकोस विकास कार्यक्रम (प्रोबेसन) अन्तर्गत म्याग्दीको बेनीमा साकोसहरुबीच कार्यकुशलता तथा सिकाई व्यवस्थापन कार्यशाला आज सम्पन्न भएको छ । न्यू धौलागिरी बचत तथा ऋण सहकारी संस्थाको आयोजना र नेफस्कूनको प्राविधिक सहयोगमा गण्डकी प्रदेश भित्रका नेफस्कूनमा आवद्ध १२ साकोसका अध्यक्ष र प्रवन्धक लगायतको उपस्थितमा सहकारीको गुणस्तर सुधारका उपायहरु र जोखिम न्यूनीकरण सम्वन्धी सिकाई ब्यवस्थापन कार्यशाला गरिएको हो । 

न्यू धौलागिरी साकोसका कार्यवाहक अध्यक्ष रामजीप्रसाद सुवेदीको अध्यक्षतामा भएको कार्यशालाको उद्घाटन बेनी नगरपालिकाका नवनिर्वाचित प्रमुख सुरत केसीले गर्नुभएको थियो । 

प्रमुख अतिथि नगरप्रमुख केसीले उत्पादनसँग जोडिएका र जोडिन चाहने युवाहरुको लागि विना धितो सीपलाई धितो मानेर लगानी गर्ने वातावरण सहकारीले निर्माण गर्नुपर्ने बताउनुभयो । उहाँले धितो विना सीपलाई आधार मानेर लगानी गर्ने नीति निर्माण गर्न आग्रह गर्दै सीपलाई आधार मानेर लगानी गरेको रकमलाई सुरक्षित गर्न स्थानीय सरकार पनि जिम्मेवार बन्ने प्रतिवद्धता जनाउनुभयो । 
उहाँले सहकारीले लगानीमात्र सुरक्षित खोजेर हुदैन्, जनताको बचत पनि सुरक्षित हुने वातावरण तयार गर्न सहकारीलाई आग्रह गर्नुभएको छ ।

सहकारीका कार्यवाहक अध्यक्ष सुवेदीको अध्यक्षता, सञ्चालक सदस्य यामबहादुर जिसिको स्वागत तथा कार्यक्रम संयोजक ठकराज बरुवालको सञ्चालनमा भएको कार्यक्रममा नवनिर्वाचित मेयर केसी र वडानम्वर ८ का वडाअध्यक्ष उत्तम कर्मचार्यलाई स्वागत एवम् सम्मान गरिएको थियो ।

सिकाई ब्यवस्थापन कार्यशालाको सहजीकरण गर्दै नेफ्स्कूनका बरिष्ठ कार्यक्रम अधिकृत भरतप्रसाद न्यौपानले सहकारी संस्थाको दिगो विकास, ब्यवस्थापन, ब्यावसायिकरण र गुणस्तर सुनिश्चित गर्न राज्यको सहकारी नीति नियममा रहेर सहकारी सञ्चालन गर्नुपर्नेमा जोडदिनुभएको थियो । उहाँले सहकारी सञ्चालन मात्र भएर हुदैन् जोखिम न्युनिकरण र सेवाहरु विश्वासिलो छ वा छैन भन्ने विषयमा सञ्चालक र कर्मचारीले ध्यान दिन समेत आग्रह गर्नुभएको थियो ।